Sumqayıt dəyişməyə başladı və bu dəyişiliklər prospektlərdə, küçələrdə, parklarda özünü biruzə verdi. Zaman keçdikcə binalar, səkilər, bardürlər, işıq dirəkləri, hətta sfetorlar belə yeniləndi. Doğrudur, dəyişməyən çox yerlər var hələ. Və bu yerlərin də heç olmasa, bəzi kələ-kötürlüklərinə əl gəzdirildi... Lakin uzun illər boyu dəyişməyən bir məkan var: "Şərq” bazarı.

Tərəfimizdən bu bazar barədə dəfələrlə söhbət açılıb, məqalələr dərc olunub, "Şərq” bazarı ilə bağlı problemlər qabardılıb. Buna baxmayaraq, nə qədər desək də, vəziyyət nəinki yaxşılığa doğru dəyişib, əksinə daha da bərbadlaşıb. İlin istənilən fəslində bazarda hökm sürən xaos, antisanitariya sanki buranın simasına çevrilib, eynilə Yaxın Şərqdə hökm sürən dağıntılar "Şərq” bazarında və onun ətrafında müşahidə olunub. Fərq ondadır ki, Yaxın Şərq silahların dağıntılarına məruz qalıb, "Şərq” bazarı pul qazanan sahibkarların.

Uzun illərdir ki, "Şərq” bazarının ətrafı yağışlı havalarda palçığın, yağmursuz dönəmlərdə isə tozun-torpağın içində itib-batır. Palçıqlı yollarda sakinlərin gediş-gəlişi əməlli-başlı müşkülə çevrilib. Bir tərəfdən də maşınların hərəkəti vəziyyəti daha da dözümsüzləşdirir. Bazarın həm meyvə-tərəvəz, həm də tikinti materialları satılan hissəsindən keçən avtomobil yolunda bəzən elə tıxac yaranır ki, Bakı-Sumqayıt şosesindəki tıxaclara şükür edirsən. Digər tərəfdən də az qala yolu işğal edən piştaxtalar... Mağazaların önündəki səkilər də "satılıb”. Meyvə-tərəvəz, cürbəcür xırdavat satanların əlindən hərəkət etmək mümkün deyil. Ümid qalır maşın yoluna ki, orda da vəziyyət yuxarıda bəhs etdiyimiz kimi, bərbaddır.

Bazarda və onun ətrafında hər metrdən satış yeri kimi istifadə edilir, ərazidə boş yer tapmaq olmur ki, zənbili yerə qoyub dincini alasan. Ya kiminsə piştaxtasının qarşısını kəsirsən ki, bu zaman ya həmin yer sahiblərinin narazılığı ilə, ya da hərəkət edən axının qarşısında mane olduğun üçün sakinlərin söyləntiləri ilə üzləşirsən.

Cərgələr arası keçiddən söhbət belə gedə bilməz. Daha doğrusu, bir xətkeş uzunluğunda yer saxlayıblar ki, ordan necə keçmək olar, özünüz bir təsəvvür edin.

Bir neçə satıcı ilə söhbət etmək istəsək də, alınmadı. Eşitdiyimiz "Qardaş, başımız aşağı salıb çörəyimizi qazanırıq. Bizlə nə işiniz var? Gedin bazarkomla danışın. Sakinlərin dediyi kimi də etdik."Şərq” bazarının müdiri Rəşid Babayevləəlaqə saxladıq. Bazar rəhbəri məsələ ilə bağlı bunları dedi: "Yolun içində alver edənlərin bazara heç bir aidiyyatı yoxdur. Onlar bazara icarə haqqı ödəmirlər, ora qətiyyən bazara aid deyil. Biz bazarın və onun ətrafındakı bir çox sahibkarlar işlətdikləri obyektlər bazara aid olduğu halda bazara icarə haqqı ödəmirlər. Yolun o cür zəbt olunmasına, yolun o vəziyyətdə olması bizim də ürəyimizcə deyil”.

Baxın, diqqətlə baxın ki, bizlər hansı bir məkandan alış-veriş edirik. Açıq havada, yağışın, küləyin altında satılan məhsulları zənbil-zənbil evimizə daşıyırıq. Bəli, yöndəmsiz piştaxtalarda, dizə çıxan palçığın içində, antisanitariya vəziyyətində işləyən satıcıların təklif etdiyi məhsulları kimsə məcburən zənbilimizə doldurmur. Bütün bu vəziyyəti göz görə-görə edirik alış-verişimizi. Bu bizim "qəbahətimiz”.

Yazını yazmaqda el arasında deyildiyi kimi, "kiminsə çörəyinə baislik etmək” fikrində deyilik. Sözün düzü, elə hamımızı düşünüb problemdən bir daha bəhs edirik. Şəkillərə diqqət yetirsəniz, bazardakı durumun nə qədər acınacaqlı olduğunu görərsiniz. Bəlkə də hər gün görürsünüz, mütləq şahidi olursunuz.

"Şərq” bazarındakı vəziyyətlə isə hələ də aiddiyyəti qurumlar susur. İstehlakçıların, sahibkarların hüquqlarını müdafiə edən təşkilatlar, sakinlərin sağlamlığının keşiyində duran qurumlar, dövlət idarələri bazarın azarını görməməzlikdən gəlir. Nəyi gözləyirik? Desəydiniz biz də sizlə birlikdə gözləyərdik.(168saat.com)