Bu gün Sumqayıtın 66 yaşı tamam olur. Qoy, bu Mənim Sumqayıtım yazısı Sumqayıt inşaatçısı Şahbazovun oğlu, Sumqayıt uşağı Seymurun öz şəhərinə və öz şəhərlilərinə yubiley təbriki olsun. Burada yazılanların, daha çox Sosialist Sumqayıtına aidiyyəti var...

Sumqayıt adında bir şəhərin olduğunu artıq aləm bilir. Onun dünyaca məşhur qeyri-rəsmi adları da var. Birincisi "Xəzər sahilində Gənclik şəhəri”dir. Bunu ona görə deyiblər ki, Sumqayıtın qurucuları və ilk sakinləri gənclər olub, Azərbaycandan və Sovet İttifaqının hər bucağından gələn, 80-dən artıq milləti təmsil edən bu bacarıqlı, istedadlı, zəkalı və qaynar təbiətli zəhmətkeş cavanlar tozlu-küləklli Abşeronun qumsal qoynunda yeni və müasir bir şəhər salıblar. 

Sumqayıta "Kimyaçılarşəhəri”, "Metallurqlar şəhəri”, "İnşaatçılar şəhəri”, "Fəhlə şəhəri” deyiblər. Bu, keçmiş SSRİ miqyasında ən iri sənaye mərkəzlərindən birini tikib-yaradan, böyük istehsal gücü olan müəssisələrdə çalışıb, iqtisadi qüdrət və yüksək rifah naminə əmək sərf edən sumqayıtlıların hünərinə verilən qiymətdir.
Sumqayıt, ilk növbədə, sadə peşə adamlarının – sadə insanların sadə şəhəridir. Bu sadəlik, mahiyyətcə, gözəllik demək olan, iddiasızlıq və təvazökarlıq, faydalı əmək və halal zəhmət, üzüağlıq və alnıaçıqlıq demək olan sadəlikdir.
Sumqayıt təzə şəhərdir: onun tarixi-memarlıq abidələri – qalası-qəsri, sarayı-mədrəsəsi yox, adamı keçmişə aparan yolları, küçələri yox. Onu müasir insanların yaşaması, oxuyub-işləməsi və dincəlməsi üçün rahat bir şəhər kimi düşünüblər. Sumqayıtın tarixi və mənəvi-estetik dəyəri, məhz onun sakinləri – sumqayıtlılardır!
Onların ilk nəsli Azərbaycanın tarixi-coğrafi bölgə və etnik müxtəlifliyini yığcam bir şəkildə təmsil edərək, yaşadıqları bu şəhərdə böyük Vətənlərinin kiçik bir nüsxəsini yaradıb. Hərə bu şəhərə öz yükünü götürüb gəlib, məişət xüsusiyyətlərini, fərqli və oxşar cəhətlərini, adət-ənənələrini, həyat və düşüncə tərzlərini, ləhcə və şivələrini gətiriblər, qaynayıb-qarışıblar, nələrisə itirib, əvəzində nələrisə əxz ediblər, nəticədə yeni bir birgəyaşayış modeli, yeni şəhər cəmiyyəti, "sumqayıtlı” kimliyi ərsəyə gəlib. Sumqayıtlı – azərbaycanlılığın, azərbaycançılığın, Azərbaycan vətəndaşlığının parlaq nümunəsidir!
Sumqayıtın 66 yaşı tamam olur, deməli, bu şəhərin ən yaşlı övladının da hələ görüləsi çox işi, hələ çox niyyəti, çox arzusu var, onun cavanlıq şövqü hələ tükənməyib. Sumqayıt kimi gənclik şəhərində – xəmiri gənclikdən yoğrulmuş bu şəhərdə qocalmaq, qoca qalmaq, qətiyyən asan deyil!
Mənim Sumqayıtım, mən səndə göz açmışam dünyaya, bir gün səndə də dünyaya gözlərimi yummaq istərdim. Yaşa, yaşa ki, sevməyənlərin baxıb çərləsin, sevənlərin görüb fərəhlənsin!

Seymur Şahbazlı