"Təhsil haqqında” qanun layihəsi Milli Məclisin Elm və təhsil komitəsində müzakirə olunsa da, qəbul olunması yubadılır.
Bunu millət vəkili, Parlamentin İqtisadi siyasət komitəsinin üzvü Vahid Əhmədov bildirib.
O, bunun səbəbini layihədə müəyyən məqamların olması ilə əlaqələndirib: "Digər səbəb isə bankların həyata keçirdiyi kredit siyasəti ilə bağlıdır. Belə ki, banklar tələbələrə aşağı faizlərlə kredit vermək istəmir."
Bu məsələnin yaxın vaxtlarda həll olunacağını deyən millət vəkili sözügedən qanunun qəbul edilməsinin olduqca böyük əhəmiyyətə malik olduğunu söyləyib: "Prezident İlham Əliyevin imzaladığı "Təhsil strategiyası” haqqında sərəncamda da təhsil kreditləri ilə bağlı xüsusi maddə nəzərdə tutulub.”
V.Əhmədov Azərbaycanın təhsil sahəsindəki mövcud digər problemlərdən də bəhs edib: "Özəl, o cümlədən dövlət ali məktəblərində ödənişli əsaslarla təhsil alan tələbələrin bir çoxu sonradan təhsil haqlarını ödəyə bilmədikləri, Bakıda kirayə tutduqları mənzillərin kirayə haqlarını ödəyə bilmədikləri və digər səbəblərlə bağlı olaraq, təhsili davam etdirə bilmir. Bu kimi problemlərin qarşısını almaq üçün həmkarım Əli Məsimli ilə birlikdə bu layihəni hazırlayıb Parlamentə təqdim etmişik. Yəqin ki, qanun yaxın vaxtlarda qəbul olunacaq."(salamnews.az)
Xəbərdən istifadə edərkən istinad etmək vacibdir.
