Sumqayıtda
"İctimai davranış qaydalarının gənclərə təşviq edilməsi” layihəsi
uğurla yekunlaşıb. Layihə Gənclər Fondunun maliyyə, Sumqayıt şəhər
Gənclər və İdman Baş İdarəsinin təşkilati dəstəyi ilə reallaşıb.
Xeberle.com xəbər verir ki, Sumqayıtdakı Gənclər Evində layihənin sonuncu seminarı
keçirilib. Yekun tədbiri ictimai davranış qaydaları haqqında videoçarxın
nümayişi ilə başlayıb.
Layihə rəhbəri Əli Zeynalov ölkədə gənclərə göstərilən diqqət və
qayğıdan danışaraq, layihənin məqsədi barədə məlumat verib. Bildirib ki,
məqsəd ictimai-mədəni-sosial qaydaları, normaları, davranış qaydalarını
gənclərə təşviq etmək, belə qaydalara əməl olunmanın vacibliyini önə
çəkmək, cəmiyyətdə daha etik, anlaşıqlı, avanqard, aqressiyadan kənar
gəncliyin yetişməsinə nail olmaqdır.
Layihənin koordinatoru, ekspertləri layihənin yeniyetmə və gənclərin
ictimai məsuliyyətinin, mədəniyyət normalarının inkişafına xidmət
etdiyini bildirib, cəmiyyətdə sağlam mövqe tutmaq istəyən gənclərin etik
qaydalara riayət etmələrinin, özlərinin mədəni səviyyələrini artırmağın
qeydinə qalmalarının vacibliyini vurğulayıblar.
Daha sonra ekspert tərəfindən şəxsiyyətin formalaşması, gənclərin
özləri və ətrafdakı insanlarla münasibətdə ictimai-mədəni-sosial
davranışların dərk edilməsi, cəmiyyətdə qəbul edilmiş mənəvi, hüquqi,
sosial standartlar və onların pozulmasının səbəbləri, qarşısının
alınması üsulları təqdimat formasında iştirakçılara izah edilib,
çalışmalar keçirilib.
Sonda gəncləri maraqlandıran suallar cavablandırılıb, maarifləndirici
xarakterli bukletlər paylanılıb və sertifikatlar təqdim edilib.
Xəbərdən istifadə edərkən istinad etmək vacibdir.
