Azərbaycanda informasiya-kommunikasiya texnologiyaları sahəsində çalışan qadınları əhatə edəcək ilk peşəkar qurum – Azərbaycan Qadınlarının İKT Klubu yaradılır. Rabitə və Yüksək Texnologiyalar Nazirliyindən verilən məlumata görə, klubun yaradılmasında məqsəd dövlət və özəl sektorlarda, habelə ictimai fəaliyyət sahələrində İKT istiqaməti üzrə fəal olan qadınları və qızları bir araya gətirməkdir.

 Klubun təsisçiləri və üzvləri öz şəxsi nümunələrindən çıxış etməklə, praktiki təlimlər vasitəsilə azərbaycanlı qadınların  sürətlə inkişaf edən bu maraqlı sahə üzrə təhsil almaq və karyera qurmaq üçün informasiya-kommunikasiya texnologiyalarının verdiyi imkanlardan  faydalanmaq  istəyini təşviq etməyi planlaşdırırlar. 

Klubun təsisçiləri arasında Rabitə və Yüksək Texnologiyalar Nazirliyi, ITECA, Yüksək Texnologiyalar üzrə Tədqiqat Mərkəzi, "B.est Solutions", "Microsoft", "HP", "Azercell", "Bakcell", "Azerfon", "BBTV", AGAT, ASAN, "Mont", "Art Scarves by Menzer Hajiyeva" kimi şirkət və təşkilatlarda çalışan qadınlar təmsil olunur.  Klubun rəsmi açılış mərasimi dekabrın 3-də 20-ci "Bakutel-2014" beynəlxalq telekommunikasiya və informasiya texnologiyaları sərgisi çərçivəsində Bakı Ekspo Mərkəzində keçiriləcək.(axar.az)