Azərbaycanda
onu çoxları tanımırdı -
Heydər Əliyev 2001-ci ildə Moskvanın Azərbaycan diasporunun fəal nümayəndəsi
kimi Bakıya dəvət edənədək...
İndi yalnız respublikamızda
deyi, Rusiyada, Almaniyada və İspaniyada da Gülağa Qənbərovu iş adamı, tkinti
biznesmeni kimi yaxşı tanıyırlar
Ancaq təbii
ki, 1970-ci illərin əvvəllərinə kimi onu dünyaya gəldiyi Ərkivan kəndindəki
həmyerlilərindən, qohumlarından və məktəb yoldaşlarından başqa doğma Masallı
rayonunda da heç kəs tanıya bilməzdi. Orta məktəbi bitirdikdən sonra dolanışığı
o qədər də yaxşı olmayan ailəsinə kömək etmək üçün bir müddət kolxozda çalışsa
da, ömründə heç vaxt Masallıdan kənara çıxmayan bu kənd uşağı günlərin bir günü
- 1976-cı ildə qatara oturub, sanki arzularının dalınca təkbaşına yollanır
tanıyıb-görmədiyi SSRİ paytaxtına - Moskvaya.
Orda işə düzəlmək üçün heç bir tanışı-qohumu
olmadığından fikrinə gəlir ki, yollansın şəhərin tikinti meydançalarından
birinə, orda münasib bir iş olmamış olmaz. Doğrudan da, o vaxtlar tikintidə hər
zaman işçi qüvvəsinə ehtiyac olduğundan onu elə həmin gün işə götürürlər. Hətta
yataqxanada yerlə də təmin olunan Gülağa elə ilk aylıq maaşından ata-anası,
qardaş-bacıları üçün pul da göndərir. Və bu onun üçün sonralar övladlıq borcu
olaraq "aylıq vərdişə" çevrilir. Aylar ötdükcə kənddə yalnız bunu
bilirlər ki, Qənbərovların bir oğlu Moskvada yaşayır və yaxşı qazanır, hər ay
ailəsinə pul da göndərir. "Halal olsun!" deyirlər, "qeyrətli
oğuldur".
Ancaq o qeyrətli oğul tikintidə ağır işlərdə çalışıb
pul qazanmaqla yanaşı ali təhsil də almağı arzulayır - özünün yaxşı insan olan
prorabı (iş icraçısı) və tikinti rəisi kimi. Və elə olur ki, işgüzar,
əməksevər, çalışqan, həm də qanacaqlı bir oğlan olduğunu görüb, ali təhsil
almağı ona tikinti rəisi özü məsləhət görür və məhz onun trestdən verdiyi
zəmanət, yaxşı xasiyyətnamə ilə uğurla imtahan verərək, ali məktəbə qəbul
olunur. Və işlədiyi kollektivdən, istehsalatdan
ayrılmadan Moskva İnşaat Mühəndisləri İnstitutunda təhsil almağa başlayır. Ancaq bir müddət sonra - 1979-cu ildə, 20 yaşında ikən
hərbi xidmətə çağırılır. Hərbi hissələrdən birində bir-neçə aylıq hərbi
təlimdən sonra birdən-birə heç vaxt yuxusuna da girməyən, qarşıdurmaların,
qanlı döyüşlərin səngimək bilmədiyi Əfqanıstana aparılır...
Orda "yenilməz" Sovet Ordusu sıralarında
olsa da, qorxubilməz, cəngavər əfqanların qızmar çöllərdə, qaranlıq gecələrdə gözlənilməz
hücumları həyəcanılı günlər, qorxulu anlar yaşadırdı. İki ilə qədər ölümün
qaşla göz arasında olduğu o yerlərdə sovet əsgəri kimi qulluq etdikdən sonra
odda-alovda bərkimiş bir gənc kimi 1981-ci ildə yenidən Moskvadakı işinə
qayıdır. Və ali təhsilini də davam etdirərək, inşaatçı-mühəndis ixtisasına
yiyələnir. Sonra da daim öz üzərində
çalışaraq, elmi-nəzəri biliyini, təcrübəsini artırır. Çalışqanlığı, səyi və əzmkarlığı
sayəsində, öz gücü ilə pillə-pillə yüksələrək, o zamankı SSRİ Ticarət Nazirliyinin
Əsaslı Tikinti və Layihələndirmə Baş İdarəsinə qədər gedib çıxır və çox keçmədən
həmin idarənin rəisi vəzifəsinə təyin edilir. Və o vaxtlar doğma Ərkivana xəbər
çatır ki, bəs Qənbərovların "uşağı" Moskvada böyük bir vəzifəyə
qoyulub. Lakin nə rayon, nə də respublika miqyasında Gülağanı heç kəs tanımırdı,
baxmayaraq ki, o vaxta kimi elmi iş işləyərək, inşaatla bağlı iki
monoqrafiyanın və hətta 5 metodik vəsaitin müəllifi idi.
Yalnız
2001-ci ilin noyabrında Ulu öndər Heydər Əliyevin təşəbbüsü ilə Bakıda keçirilən
Dünya azərbaycanlılarının ilk qurultayına dəvət alarkən Gülağa Qənbərov barədə
respublikada səs-səda yayılır. Fərəh doğuran xoş səs-səda!..
Əlbəttə,
hər zaman azərbaycanlı olması ilə fəxr
edən, bununla böyük qürur duyan dahi rəhbərin komandası son illər özünün uğurlu
fəaliyyəti ilə nəinki Moskvada, hətta xaricdə tanınmağa başlayan istedadlı, işgüzar və təşəbbüskar biznesmen kimi Gülağa Qənbərovu diqqətdən
kənarda saxlya bilməzdi və o, Moskvada Azərbaycan Diasporunun Rəyasət heyətinin
üzvü olaraq qurultay nümayəndəsi kimi Bakıya rəsmən dəvət edilmişdi.
Heydər Əliyevin SSRİ hökumətinin nüfuzlu
rəhbərlərindən biri kimi Kremldə çalışdığı dövrdə özünü Moskvada arxa-dayaqlı
hiss edən, daim ona böyük məhəbbət bəsləyən Gülağa Qənbərov respublika
rəhbərinin 1-ci qurultaydakı çıxışını maraqla dinləmiş və onun vətənpərvərlik
çağırışlarına cavab olaraq Azərbaycanla əlaqələrini gücləndirmiş, respublikaya
əlindən gələn köməyi etməyə, daim doğma xalqın yanında, onunla birgə olmağa
çalışmışdır. Və həmin tarixi qurultaydan cəmi 3 ay sonra - artıq 2002-ci ilin
martında Azərbaycana gələrək, böyüyüb boya-başa çatdığı Masallı
rayonunda öz vəsaiti hesabına bir sıra humanitar və xeyriyyə layihələrini həyata
keçirmiş (başladığı tikinti, təmir-abadlıq işləri ilə yanaşı, 13 şəhid ailəsini
də himayəyə götürmüşdü), eləcə də Bakının Xəzər və Xətai rayonlarındakı internat
məktəblərin, həmçinin uşaq evinin, müharibə və əmək veteranları
pansionatının inşaat, təmir-bərpa və təchizat məsələləri üçün xeyli vəsait ayırmışdı.
Xalqımızın yaradıcı ziyalılarını daim hərtərəfli
dəstəkləyən, özü də neçə illər idi ki Gülağa Tənha imzası ilə poetik
yaradıcılıqla məşğul olan, orujinal
şeirlər müəllifi Gülağa müəllim 2003-cü ildə Azərbaycan Yazıçılar Birliyinin, bir
il sonra isə respublika Jurnalistlər Birliyinin üzvlüyünə qəbul edilmişdir. O,
Yazıçılar Birliyinin və Bəstəkarlar İttifaqının tanınmış nümayəndələrinin bir
sıra dəyərli əsərlərinin çap edilməsinə maliyyə dəstəyi göstərmiş, hələ məktəb
illərindən çox sevdiyi dahi şair Mirzə Ələkbər Sabirin Şamaxıdakı məqbərəsinin bütünlüklə
abadlaşdırılmasını təmin etmişdir.
Görkəmli şair və yazıçılar Bəxtiyar
Vahabzadə, Anar, Qabil, Fikrət Qoca, Nəriman Həsənzadə, Əlibala Hacızadə,
həmçinin Vasim Məmmədəliyev, Mahmud Kərimov, Budaq Budaqov, Musa Musayev, Bəkir
Nəbiyev, Akif Əlizadə kimi dünyada tanınan alimlərimizlə, Şəfiqə Axundova,
Ramiz Mirişli, Səyavuş Kərimi, Eldar Mansurov kimi musiqiçilərimizlə görüşüb,
tanış olmuşdur. Vətənin düşünən
beyni, vuran qəlbi olan o nurlu insanların arzu-diləklərini dinləmək Gülağa Tənha üçün sanki Qarabağ problemləri fonunda xalqın ağrı-acılarını
az da olsa azaltmaq vasitəsi kimi bir sıra gərəkli layihələrə çağırış
oldu. Azərbaycanın rəssamlıq məktəbinin görkəmli nümayəndəsi Kamil
Əliyevlə, istedadlı, vətənpərvər memar Rasim Əliyevlə dostluq əlaqələri onu
xeyriyyəçiliyi daha geniş şəkildə davam etdirməyə, doğma Vətənə yeni töhfələr
verməyə ruhlandırdı. Gülağa müəllimin təşəbbüsü və vəsaiti hesabına
müasirlərimiz olan, lakin artıq sağlıqlarında klassikləşmiş şair və
yazıçılarımızın seçilmiş əsərlərinin nəşri, dövlət başçısının ölkədə idmanın inkişafına
göstərdiyi qayğıya, ümidverici uşaq və gəncləri himayə etməsi nümunəsinə uyğun
olaraq bir-çox müsabiqələrin, həvəsləndirici aksiyaların keçirilməsi onun doğma
xalqın istedadlı nümayəndələrinə olan sevgisinin, gənclərə olan böyük inamının,
ümidinin ifadəsidir.
İxtisasca tikinti-inşaat mühəndisi olduğundan və
ömrünün çox hissəsini bu sahəyə həsr edib, zəngin təcrübə qazandığından
Azərbaycanda da tikinti-abadlıq tədbirləri üzrə ölkə rəhbərinin apardığı geniş
miqyaslı işlərə özünün də töhfəsini verməyə çalışan, uşaqların mükəmməl təhsil
alması üçün yaxşı şəraitin də olmasının vacibliyini unutmayan Gülağa müəllim
Bakının Xəzər rayonunun Şüvəlan qəsəbəsində yararsız vəziyyətdə olan 5 saylı
internat məktəbini yenidən inşa etdirmişdir. Ulu öndərin 80 illik yubileyi
münasibətilə həmin məktəbin təməlqoyma mərasimindən düz bir il sonra - 2004-cü
ilin may ayının 10-da müasir standartlara cavab verən internat kompleksi istifadəyə
verilmişdir. Həmin dövrdə Şüvəlan qəsəbəsindəki 1 saylı internat məktəbin
əsaslı təmiri də qısa müddət ərzində başa çatdırılmışdır.
Vətənpərvər bir ziyalı, geniş imkanlı
biznesmen kimi o, həm də ölkəmizin idman şərəfini qoruyan gənclərimizə daim
maddi və mənəvi dayaq olaraq, onların respublikada və xarici ölkələrdə
keçirilən bir sıra beynəlxalq yarışlarda iştirakını maliyyələşdirmişdir.
Heydər Əliyev Fondunun yaradıldığı ilk
günlərdən etibarən Gülağa Qənbərov xeyriyyəçilik fəaliyyətini bilavasitə Fondun
rəhbərliyi altında davam etdirmişdir. Fondun layihələri əsasında Masallı və
Şamaxı rayonlarındakı iki orta məktəbin yeni binaları qısa müddət ərzində inşa
edilərək, lazımi məktəb ləvazimatları ilə təmin olunmuşdur.
Ümummilli lider Heydər Əliyevin həmişə böyük fəxrlə ucadan
söylədiyi, Prezident İlham Əliyevin çıxış və nitqlərində daim vurğuladığı "Müstəqilliyimiz
qürur mənbəyimizdir!” kəlamı dünyanın hər yerində həmvətənlərimizin də
dillərinin əzbəri olmuşdur. Lakin Ulu öndərin xüsusi olaraq qeyd etdiyi kimi,
dövlət müstəqilliyini qazanmaqla iş bitmir, əsas məsələ onu qoruyub
möhkəmləndirməkdən, dönməz prosesə çevirməkdən ibarətdir. Bu tarixi vəzifənin
uğurla gerçəkləşdirilməsi təkcə Azərbaycanda yaşayan vətəndaşların deyil,
bütövlükdə dünya azərbaycanlılarının müqəddəs işidir. Ona görə də Ümummilli
liderimiz dünyanın harasında olurdusa, orada yaşayan soydaşlarımızı bir yerə
toplayıb, onları Vətənlə daim sıx əlaqə saxlamağa çağırır, Azərbaycan
həqiqətlərini dünyanın hər yerinə çatdırmağı, dövlət müstəqilliyimizin keşiyində
qətiyyətlə, mübarizliklə, mətanətlə dayanmağı tövsiyə edirdi.
Vətənpərvər ziyalı, istedadlı şair və xeyriyyəçi
Gülağa Qənbərov Azərbaycanın dövlət maraqları, müstəqilliyimizlə,
azərbaycançılıqla bağlı ürək dolusu danışaraq, son illərdə ölkəmizin sürətli
inkişafına qəlbən sevinərək, fərəhlə deyir:
- Respublikamızdan kənarda yaşayan bir azərbaycanlı
kimi xalqımıza layiqincə xidmət etmək məqsədilə ölkə Prezidenti cənab İlham
Əliyevin və birinci vitse-prezident Mehriban xanım Əliyevanın vətənpərvərlik, dövlətçilik
ideyaları ətrafında xalqımızla sıx birləşərək, onların ölkəmizin
sosial-iqtisadi, mədəni tərəqqisinə, sivil dünya birliyinə inteqrasiyasına,
xalqımızın maddi rifahının yaxşılaşdırılmasına yönəldilmiş siyasətin təbliğinə
və həyata keçirilməsinə daim dəstək olmuşam və olmaqda davam edirəm. Ölkəmizdən
kənarda yaşayan bütün həmvətənlərimizi də Azərbaycana, onun rəhbərliyinə ehtiram göstərərək, dəstək
olmağa çağırıram!
Ümumilli liderimizin layiqli davamçısı İlham Əliyevin bütün
sahələr üzrə həyata keçirdiyi geniş miqyaslı yenilənmə siyasəti çərçivəsində uğurla
aparılan demokratik islahatlar dalğasının xoş təsirli ab-havasında yaşayan
Azərbaycan yenə beynəlxalq aləmin diqqətini özünə cəlb edir. Ölkə rəhbərinin müstəqil
Azərbaycan dövlətinin müasirləşdirilməsi üçün, onun bütün sahələrdə inkişafının
davamını qloballaşan dünyanın çağırışlarına uyğunlaşdırıb, yeni trendlər
əsasında daha uğurlu və zəngin etməyə hesablanan islahatları xarici ölkələrin
mütəxəssisləri və ekspertləri tərəfindən də yüksək dəyərləndirilir.
Prezident İlham Əliyevin son zamanlar həyata keçirdiyi
islahatlar digər dünya dövlətlərinin ictimai-siyasi həyatında fəallıqları ilə
seçilən, həmin dövlətlərin elmi-mədəni elitaları sırasına daxil olmağı bacaran
ziyalı iş adamları, müxtəlif sənət və peşə sahibi, ictimai-siyasi xadim kimi
tanınan və nüfuz sahibi olan soydaşlarımızın da ürəyincədir.
İslahatların davam etdirilməsi yolunda ortaya çox
güclü siyasi iradə qoyan möhtərəm Prezident qətiyyətlə bildirib ki, o,
Azərbaycanı müasir, sürətlə inkişaf edən, şəffaflığı öz siyasətində bayrağa
çevirən ölkə kimi görmək istəyir. Və heç kim bu istiqamətdə aparılan işlərə
mane ola bilməz.
Rəy sorğuları göstərir ki, cənab Prezident bütün
seçkilərdə qalib gəlmək iqtidarındadır, nəzərdə tutulan islahatları həyata keçirmək
üçün güclü xalq dəstəyinə malikdir. Dünyada və bölgədə cərəyan edən təzadlı siyasi
proseslər fonunda ölkə başçımızın fəaliyyətindəki uğurlar, dövlətçiliyimizin qorunmasının
başlıca qarantı kimi öz layiqli, yüksək qiymətini alıb.
Danılmaz həqiqətdir ki, ictimai-siyasi proseslərin önündə
yox, arxasınca getməklə irəliyə doğru hər hansı addım atmaq mümkün deyil. İndi daha
gənc, yüksək təhsilli və dünyagörüşlü, müasir düşüncəli, fəaliyyətində daha
çevik kadrlarla işləməyə üstünlük veriləcək. Prezident İlham Əliyev cəmiyyətə
əvvəlcədən bəyan etdiyi islahatlarda bu prinsipləri əsas götürür və hər zaman ölkədaxili
ictimai-siyasi ab-havanın daha da saflaşması, pozitivləşməsi istiqamətində
mühüm addımlar atır.
Məhz bunun nəticəsidir ki, Azərbaycan dünyanın inkişaf
etməkdə olan ölkələri sırasında 3-cü yerə yüksəlib, bütün reytinq sorğularında
isə öncül mövqeləri tutur. Ölkə başçısı imzaladığı bütün sosial proqramlarda
müasirləşdirməni əsas götürür. Əhalinin bütün təbəqələrinin maddi rifahının
yaxşılaşmasına xidmət edən sərəncamlar verilir, məhkəmə-hüquq islahatlarının
keçirilməsi ilə bağlı sənədlər təsdiqlənir, şəhid ailələri daim nəzarətdə saxlanılır,
əhalinin müxtəlif təbəqələri ilə görüşlər keçirilir, ardıcıl olaraq əfv
sərəncamları verilir, yerli və mərkəzi icra strukturlarında önəmli kadr
dəyişiklikləri aparılır.
Cəmiyyətdə qarşılıqlı anlaşmanı, islahatları daha da dərinləşdirmək
üçün ictimai rəydən alınan dəstəyi getdikcə artıran yeni kadr islahatları
ölkəmizdən kənarda fəaliyyət göstərən və yüksək nüfuz sahibi olan
həmyerlilərimizi, onların təmsil olunduqları diaspor təşkilatlarımızı da sevindirir.
Cənab Prezident nəinki ölkə daxilində, hətta ölkədən kənarda da Azərbaycanın
milli maraqlarını yüksək səviyyədə qoruyur. Özünün daxili və xarici siyasəti
ilə müdriklik nümunəsi göstərən ölkə rəhbərimizin dünyada qlobal böhranın davam
etdiyi çətin bir şəraitdə Azərbaycanda inkişafın təmin edilməsi ilə bağlı
səsləndirdiyi fakt və rəqəmlər bir azərbaycanlı kimi qəlbimi dağa döndərir.
İnkişaf edən ölkələr sırasında Azərbaycanın liderlik mövqeyinə yüksəlməsi
müstəqilliyimizin etibarlı, mötəbər təminatı olan iqtisadi qüdrətimizin
ildən-ilə artmasının fərəhli göstəricisidir.
Qarşıda sahibkarlığı daha da inkişaf etdirmək, emal
müəssisələri yaratmaq üçün yeni üfüqlər açılır. Xaricdə yaşayan iş adamlarımız
bu prosesdə də öz sözlərini deyə bilərlər və yəqin ki hökmən deyəcəklər.
Regional inkişafda yüksək nailiyyətlər
əldə etmək üçün ölkə başçısı sənaye ilə yanaşı aqrar sahəni də yüksək səviyyəyə
çatdırmaqla bağlı qarşıya ciddi vəzifələr qoymuşdur. Sahibkarlığı daha da
inkişaf etdirmək, emal müəssisələri yaratmaq üçün yeni imkanlar yaradılır.
Xaricdə yaşayan iş adamlarımız bu prosesdə də öz sözlərini deyə bilərlər və
yəqin ki hökmən deyəcəklər. Azərbaycanın daha yüksək inkişafı naminə maksimum
köməyimlə, dəstəyimlə Vətən qarşısında oğulluq, vətəndaşlıq borcumu yerinə
yetirməkdə, bundan sevinc və qürur duymaqda daha israrlı, daha qətiyyətli
olmağa çalışıram.
Masallı kimi bölgədə boya-başa çatmış bir azərbaycanlı
kimi şəhər və kəndlərimizdə də paytaxtın üstün abadlığının, rahatlığının
olmasını həmişə ürəkdən arzu etmişəm. Həm də düşünmüşəm ki, bu ağır işi
rayonlarımızın potensialını hərəkətə gətirməklə etmək mümkündür. Tale bu
istəyimin də gerçəkləşməsini görməyi mənə nəsib etdi. Ulu öndərin liderlik
missiyasını uğurla davam etdirən Prezident İlham Əliyevin "Mən hər bir
azərbaycanlının prezidenti olacağam” və "Bölgələri də paytaxt kimi inkişaf
etdirməyə çalışacağam” məramı, bununla da regional inkişaf proqramlarına təkan verməsi
məni də çoxdankı arzularımın gerçəkləşdirilməsinə həvəsləndirdi.
Vətəndən uzaqda yaşayan bir azərbaycanlı kimi öz dövlətini
və xalqını ürəkdən sevən minlərlə həmvətənlərimlə yanaşı ölkəmizin iqtisadi
qüdrətinin artırılması, müstəqilliyimizin dayaqlarının daha da
möhkəmləndirilməsi yolunda daim ölkə başçımızla və xalqımızla bir yerdəyəm və
daim biryerdə olacağam. Bu, mənim ən böyük, ən əsas amalımdır!
Qələmə aldı: Rəhman ORXAN,
Respublikanın Əməkdar jurnalisti.
Xəbərdən istifadə edərkən istinad etmək vacibdir.