2014-ci il 1 dekabr tarixində Azərbaycan Respublikasının Prezidenti yanında Gənclər Fondunun maliyyə dəstəyi ilə Gənc Politoloqlar Mərkəzinin (GPM) təşkilatçılığı ilə "Gənc tədqiqatçıların elmi potensiallarının artırılması” (GTEPA) adlı layihəsi çərçivəsində növbəti seminar təşkil olunub. Layihə çərçivəsində tərtib olunmuş proqrama uyğun olaraq Odlar Yurdu Universitetinin kiçik zalında keçirilən 2-ci seminar məşğələsində iştirakçı gənc tədqiqatçılar "Elmi tədqiqatın planlaşdırılması” və "Xəzərin statusu və hövzə ölkələrinin mövqeyi” mövzularında seminar aparılıb.
İlk olaraq tədbiri giriş sözü ilə açan layihənin koordinatoru Nəriman Qaraxani plan üzrə cari seminar mövzularının əhəmiyyətindən danışaraq gənc tədqiqatçılar arasında elmə olan marağı və onların potensialının artıtılması üçün məqsədəuyğun tədbirlərin görülməsindən söz açıb. O, auditoriyanın təklif və fikirlərini dinləyib, plan üzrə seminar mövzularını aparacaq məruzəçiləri auditoriyaya təqdim edib.
"Elmi tədqiqatın planlaşdırılması” mövzusu üzrə Qafqaz Universitetinin müəllimi, tarix elmləri üzrə fəlsəfə doktoru Ceyhun Mahmudlu çıxış edib. O, çıxışında gənc tədqiqatçılar üçün tarix elminin əsas problemləri, Azərbaycan tarixinin işlənməmiş, tədqiq olunmamış səhifələri, xüsusilə ərəb və fars mənbələri ilə bağlı olan Şərqşünaslıq elminin daha dərindən öyrənilməsinin zəruriliyini vurğulayıb, gənc tədqiqatçıları bu istiqamətə həvəsləndirərək bu sahədə elmi tədqiqat işinin gələcək perspektivlərinin yüksək olmasından söhbət açıb. Məruzəçi həmin elmlər üzrə fundamental və axtarış tədqiqatlarının aparılması, vacib, aktual istiqamətlərinin inkişaf etdirilməsi və yeni texnika və texnologiyaların yaradılmasının vacibliyindən danışıb. Həmçinin həmin elmlər üzrə yüksək ixtisaslı elmi və elmi-pedaqoji kadrların hazırlanması, ictimai, humanitar elmlərin mütəxəssislərinin peşəkarlığının yüksəldilməsi, onların elmi tədqiqat işlərinin praktikada istifadə olunması yollarından, bu yolda sosioloji, rəy sorğularının aparılmasını vacibliyindən söz açıb.
İkinci məruzəçi Qafqaz Universitetinin müəllimi Şamxal Əbilov "Xəzərin statusu və hövzə ölkələrinin mövqeyi” mövzusu üzrə geniş çıxış edib. O, gənc mütəxəssis kimi Xəzərin hüquqi statusu ilə bağlı hazırkı Xəzəryanı dövlətlər arasında gedən elmi, nəzəri, praktiki dialoqdan söhbət açıb və beynəlxalq hüquq, xüsusilə dəniz hüququ üzrə peşəkar elmi tədqiqatlara və mütəxəssislərə - gənc tədqiqatçı alimlərə böyük ehtiyacın olduğunu qeyd edib. O, apardığı tədqiqatlardan çıxış edərək bir çox aktual siyasi, geostrateji, iqtisadi məsələlərə toxunub. Öncə Xəzər dənizinin təbii xüsusiyyətləri və iqtisadi əhəmiyyəti, sonra problemin tarixi - SSRİ-nin dağılması zamanına qədər bu dənizin hüquqi statusuna nəzər salıb. Məruzəçi SSRİ-nin dağlıması ilə Azərbaycan, Qazaxıstan və Türkmənistan Respublikalarının yaranması ardınca Xəzərin hüquqi statusu ilə əlaqədar ortaya çıxan problemləri diqqətə çatdıraraq, bu haqda 5 Xəzəryanı ölkə, özəlliklə Azərbaycan, Rusiya və İranın mövqeləri haqqında məlumat verib. Həmçinin auditoriyaya ötən əsrin sonlarında ulu öndər Heydər Əliyevin uğurlu neft siyasətinin nəticəsi olaraq "Əsrin müqavilə”sinin bağlanmasının tarixi, siyasi, iqtisadi, elmi zərurətindən danışıb.
25-ədək gənc tədqiqatçının iştirak etdiyi tədbir maraqlı müzəkirə və fikir mübadiləsi şəraitində keçib. Seminara gənc tədqiqatçılardan əlavə, Odlar Yurdu Universitetinin bir neçə magistri fəal şəkildə qatılıb. Seminar müşavirədə Odlar Yurdu Universitetinin Elmi işlər üzrə prorektoru, professor Tərlan Abdullayev şıxış edərək öz elmi tövsiyələrini verib.
Xatırladaq ki, GPM tərəfindən təşkil olunan "Gənc Tədqiqatçıların Elmi Potensiallarının Artırılması” (GTEPA) adlı layihə müxtəlif elm sahələri üzrə elmi tədqiqatlar aparan magistr, dissertant və dokotorantlar, gənc alimlər və ümumiyyətlə elmi tədqiqata meyilli olan potensial gənc tədqiqatçılara müasir interdisplinar tədqiqat metodlarının öyrədilməsi və təcrübədə tətbiq edilməsinin təmin edilməsi məqsədi ilə həyata keçirilir. Layihədən ümumilikdə 50 gənc elmi tədqiqatçı faydalanmaqdadır. Layihə ilin sonunda Odlar Yurdu Universiteti ilə GPM-nin birlikdə keçirəcəyi böyük elmi-praktik konfransla yekunlaşacaq.
Bildirək ki, layihə çərçivəsində növbəti seminar 5 dekabr 2014-cü il tarixində saat 11:00-da Odlar Yurdu Universitetinin kiçik zalında keçiriləcək.(azadaz.com)
|
|
