"Ermənistanın Kollektiv Təhlükəsizlik Müqaviləsi Təşkilatına üzvlüyü onun üçün zəmanətdir. Ümumiyyətlə, bu təşkilata üzvlük Ermənistanın mövcudluğunun zəmanətidir”.

Bunu Ermənistan mətbuatına müsahibəsində Beynəlxalq Avrasiya Hərəkatının lideri, Kremlin millətçi ideoloqu , politoloq Aleksandr Dugin deyib.   

Ekspert bildirib ki, postsovet məkanındakı dövlətlər öz strateji məsələlərini həll etmək üçün ABŞ-a arxayın olursa, öz ərazi bütövlüyünü itirirlər. Alaksandr Dugin strateji seçim məsələsi fonunda əvvəllər olduğu kimi, bu dəfə də Ermənistanı hədələyən fikir səsləndirib: "Biz Gürcüstan, Ukrayna və Moldova nümunəsində bunu gördük. Ermənistanın isə sadəcə olaraq seçimi yoxdur. Ermənistanın Avrasiya İqtisadi Birliyinə girişi onun müstəqilliyini və təhlükəsizliyinin qorunması üçün lazımdır. Kollektiv Təhlükəsizlik Müqaviləsi Təşkilatı və Avrasiya İqtisadi Birliyi Ermənistanın sağ qalması üçün lazımlıdır”.   

Politoloq Dağlıq Qarabağ münaqişəsi ilə bağlı məsələlər barədə də danışıb. Onun sözlərinə görə Qarabağla bağlı vəziyyətin qalması üçün Ermənistanın Avrasiya Birliyində olması vacibdir.  

Dugin qeyd edib ki, status-kvonun dəyişikliyi məsələsində yalnız ABŞ maraqlıdır və onun  Rusiyaya hazırda bütün istiqamətlər üzrə hücum etməsi tamamilə mümkündür.   

Beynəlxalq Avrasiya Hərəkatının lideri Gümrüdə 102 saylı hərbi bazanın əsgəri Valeri Permyakovun erməni ailəsinin 6 üzvünü qətlə yetirməsinə da münasibət bildirib.

O hesab edir ki, hadisənin arxasında Rusiya ilə Ermənistanın müttəfiqliyini istəməyən güclər dayanır. "Ermənistanda elə güclər mövcuddur ki, Rusiya ilə Ermənistanın strateji müttəfiqi olduğunu anlayırlar. Elə dairələr var ki, Qərbə işləyirlər və Ermənistanı Rusiyadan uzaqlaşdırmağa çalışırlar. Xoşagəlməz hadisələr siyasi məsələyə çevrilirsə, artıq sifarişçiləri axtarmaq lazımdır. Bu hərəkətin mənbələrini axtarmaq lazımdır.  Xüsusilə, Rusiyadan uzaqlaşmaq istəyən geosiyasi maraqlara diqqət etmək lazımdır”,-deyə Dugin bildirib.   (modern.az)