Özəl klinikaların səhiyyə xidmətlərindəki mövqeyi güclənməkdə davam edir. Ancaq fakt odur ki, onların göstərdikləri xidmətə görə qiymətlər əhalinin böyük əksəriyyətinin gəlirləri ilə uyğunlaşmır. Bu isə normal keyfiyyətdə müayinə və müalicə almaq istəyən vətəndaşın xüsusilə cərrahi əməliyyatlara ehtiyac olduqda – daha doğrusu, kasıb vətəndaşın banklara, kreditlərə üz tutmasına, borclanmasına gətirib çıxarır. Amma sözümüzün canı bunda deyil. Özəl klinikaların qiymət fərqindən danışacağıq.

Bir klinikada 30 manata olan müayinənin başqasında 40–50 manata olması hansı məntiqə uyğundur? Hətta ən adi analizlərdə belə klinikaların qiymətləri arasında fərqlər var. Kimsə bunun xidmətin keyfiyyəti ilə əlaqələndirə bilər. Amma istənilən halda, heç bir xidmətə heç kim istədiyi qiyməti qoya bilməz – qoya bilməməlidir. Ancaq əlahəzrət fakt var!

Bu həftə Sumqayıtdakı özəl klinikalardakı qiymətlərlə bağlı kiçik bir araşdırma apardıq. Öyrənmək istədik ki, görək hansı tibb müəssisələri öz qiymətlərində yuxarında gedir?

Klinikalardan qanın ümumi analizinin qiymətini soruşduq. Məlum oldu ki, bu müayinə üçün qiymətlər 7 – 15 AZN arasında dəyişir. Ən bahacıl isə "Bakı” klinikasıdır.

Maraqlıdır ki, bəzi tibb müəssisələri telefon vasitəsilə qiymət açıqlaması verməkdə tərəddüd edirdilər.

Beləliklə, ümumi qan analizi üçün klinikalarda tariflər bu cürdür.

Bioloji Təbabət – 8 AZN

Hippokrat – 7 AZN

Uğur – 8 AZN

Real – 9 AZN

Doktor Az – 7 AZN

AQS Center – 10 – 15 AZN (Dəqiq qiymət göstərməyiblər)

İntermed - 12 AZN

Sağlam ailə – 12 AZN

Bakı – 13 AZN

Qəlb – 7 AZN

Klinikaların bəziləri qiymətləri telefonla bildirməklə tərəddüd etdi. Məsələn, "Doktor.az” da telefonla cavab verən xanım bildirdi ki, həkim göndərişi ilə gələn xəstələrə telefonla qiymət deyilmir: "Çünki bir neçə müayinə ola bilir. Bura gələndə qiymət anlaşılmazlığı yaşanır”

"AQS Dental” dan verilən cavab da maraqlı idi: "Telefonla dəqiq qiymət bildirilmir, yalnız təxmini qiyməti deyə bilərik. Bununla bağlı müdriyyətin tapşırığı var. Özünüzlə 10-15 AZN götürün, nə artıq qalsa, qalacaq da…”

Şəhər sakinləri arasında apardığımız sorğu isə göstərdi ki, bəhs etdiyimiz müayinə üçün sumqayıtlılar son 1 ilə daha çox "Sağlam ailə” və "İntermed”ə üz tuturlar.

Məlumat üçün deyək ki, eyni müayinə paytaxtın ən bahalı sayılan klinikalarında belə Sumqayıtdakı özəl tibb müəssisələrindən ucuzdur. Məsələn:

Baku Medical Plaza – 8 AZN

HB Güvən – 8 AZN

Vüsal Məmmədov, 168saat.com