Sumqayıtın 13-cü mikrorayonunda Sumqayıt Bələdiyyəsi üzvlüyünə namizədlərlə seçicilərin növbəti görüşü olmuşdur.Azərbaycanın Dövlət himninin səsləndirilməsindən sonra tədbiri giriş sözü ilə açan Yeni Azərbaycan Partiyasının Sumqayıt şəhər təşkilatının sədri Asif İmaməliev respublikamızın bugünkü yüksəliş və nailiyyətlərində, beynəlxalq nüfuzunun artmasında xalqımızın ümummilli lideri Heydər Əliyevin tarixi rolundan və onun layiqli davamçısı, ölkə Prezidenti İlham Əliyevin Azərbaycanı dünyanın qabaqcıl ölkələrindən birinə çevirmək yolunda gərgin və yorulmaz fəaliyyətindən geniş söhbət açmışdır.

Sonra Bələdiyyə üzvü kimi şəhərin özünüidarəetmə strukturunda çalışmaq istəyində olan YAP namizədləri seçicilərə təqdim edilmişdir.

Bələdiyyə üzvlüyünə namizəd, Sumqayıt Bələdiyyəsinin hazırki sədri professor Əbülfəz Babayev Azərbaycanda bələdiyyələrin yerli özünüidarəetmə orqanı kimi təşəkkülündən və inkişafından, Bələdiyyə sisteminin Azərbaycanda yerli özünüidarəetmə orqanı kimi tətbiqində və hüquqi status qazanmasında ulu öndər Heydər Əliyevin xidmətlərindən söhbət açmış, bu quruma dövlətin göstərdiyi diqqət və qayğıdan, Sumqayıt Bələdiyyəsinin son illərdə şəhərin qaynar ictimai-siyasi, mədəni həyatında fəal iştirakından, məhəllə və mikrorayonlarda seçicilərin arzu və istəkləri əsasında həyata keçirilən tədbirlərdən, Bələdiyyə üzvlərinin təşəbbüskarlığı və təklifləri üzrə maraqlı və faydalı layihələrin reallaşmasından danışmışdır.Sonra Bələdiyyə üzvlüyünə namizədlərdən Mətanət İsmayılova, Musa Həsənov, Elvin Məmmədzadə çıxış edərək, gələcəkdə Bələdiyyə üzvü kimi diqqət yetirəcəkləri, həllinə çalışacaqları məsələlər barədə seçicilərə məlumat vermişlər.

Görüşdə çıxış edən seçicilər Cəbrayıl Əlinağıyev, Canıbəy Ağayev, Simuzər Məmmədova, Yusif Dənziyev, Şövkət Akimova və digərləri son illərdə Sumqayıt Bələdiyyəsinin fəaliyyətinin daha da canlandığını, bunun özünü real tədbirlərlə büruzə verdiyini bildirmiş, lakin Bələdiyyə tərəfindən həyata keçirilən tədbirlərin mətbuat və televiziyada kifayət qədər işıqlandırılmadığını bir irad olaraq diqqətə çatdırmışlar.

Seçicilər namizədlərə gələcək fəaliyyətləri ilə bağlı suallar vermiş, onlara seçkilərdə və seçkilərdən sonra uğurlar arzulamışlar.