2014-ci il 5 dekabr tarixində, saat 11:00-da Odlar Yurdu Universitetinin kiçik akt zalında Azərbaycan Respublikasının Prezidenti yanında Gənclər Fondunun maliyyə dəstəyi ilə Gənc Politoloqlar Mərkəzinin (GPM) təşkilatçılığı ilə "Gənc tədqiqatçıların elmi potensiallarının artırılması” (GTEPA) adlı layihəsi çərçivəsində növbəti seminar təşkil olunub. Layihə çərçivəsində tərtib olunmuş proqrama uyğun olaraq keçirilən 3-cü seminar məşğələsində iştirakçı gənc tədqiqatçılar "Dağlıq Qarabağ münaqişəsinin həlli istiqamətində gənc tədqiqatçıların əsas elmi-siyasi yanaşmaları, problemin həlli perspektivləri barədə elmi, siyasi və geostrateji mülahizələr” ətrafında müzakirə aparıblar.
Öncə tədbiri giriş sözü ilə açan adıçəkilən layihənin koordinatoru Elnur Ağayev plan üzrə cari seminar mövzularının əhəmiyyətindən danışaraq gənc tədqiqatçılar arasında Dağlıq Qarabağ probleminin mahiyyəti və münaqişənin həlli ilə bağlı elmi araşdırmaların vacibliyini qeyd edib. Və bu zərurətdən irəli gələrək seminarın mövzusunun aktuallığını və gənc tədqiqatçıların bu istiqamətdə elmi axtarışlarının aparılması üçün məqsədəuyğun tədbirlərin görülməsindən söz açıb. O, auditoriyanın təklif və fikirlərini dinləyib, plan üzrə seminar mövzusunu aparacaq məruzəçini auditoriyaya təqdim edib.
Odlar Yurdu Universitetinin müəllimi, BDU-nun beynəlxalq münasibətlər kafedrasının dissertantı Mustafa Əhmədov "Dağlıq Qarabağ münaqişəsinin həlli istiqamətində gənc tədqiqatçıların əsas elmi-siyasi yanaşmaları, problemin həlli perspektivləri və elmi, siyasi və geostrateji mülahizələr” mövzusu üzrə geniş çıxış edib.
Müzakirə zamanı seminar iştirakçıları Dağlıq Qarabağ münaqişəsinin həlli ilə bağlı ümummili lider Heydər Əliyevin müəyyən etdiyi siyasi strategiyanın, taktikanın düzgünlüyündən və Azərbaycan Respublikasının Prezidenti cənab İlham Əliyev tərəfindən həyata keçirilən balanslaşdırılmış xarici siyasətin və diplomatiyanın uğurlarından bəhs ediblər. Daha sonra gənc tədqiqatçılar Dağlıq Qarabağ münaqişəsinin mümkün həlli yollarını müzakirə edərək, problemin həllinin hərbi yolla və ya siyasi dialoq – sülh yolu ilə mümkünlüyü variantları barədə fikir mübadiləsi aparıblar. Seminar iştirakçıları elmi-siyasi yanaşmalarla və tutarlı elmi mülahizələrlə dünyada gedən hazırkı proseslərin məntiqi cəhətdən təhlil edərək belə bir elmi qənaətə gəliblər ki, problemin həllinin sülh yolu ilə nizamlanması ən doğru, siyasi və elmi cəhətdən əsaslandırılmış bir yoldur. Lakin bu yol o şərtlər daxilində öz elmi təsdiqini tapa bilər ki, Ermənistan Respublikasının rəhbərliyi tezliklə tutduğu siyasi xəttin qeyri-sağlam və qeyri-konstruktiv olduğunu dərk etsin və işğalçılıq siyasətindən əl çəkərək zəbt etdiyi torpaqları qeyd-şərtsiz boşaltsın. Bu mümkün olmadıqda gec-tez problemin hərb yolu ilə həlli variantı qaçılmaz olur. Bu haqda dövlət başçısının dəfələrlə səsləndirdiyi bəyanatların elmi-siyasi baxımdan əsaslı olması da seminarda vurğulandı.
Məruzəçi və seminar iştirakçıları bu istiqamətdə elmi-tədqiqat işlərinin daha çox yazılmasını, xüsusilə reytinqli beynəlxalq elmi jurnallarda məqalələr dərc edilməsinin vacibliyini qeyd etdilər. Həmçinin, dünyanın müxtəlif dövlətlərində elmi-strateji dairələrlə birlikdə seminarlar, simpoziumlar, konfransların keçirilməsi, ələlxüsus da müxtəlif xarici dillərdə olan elmi nəşrlərin, məqalələrin dərc olunub yayılması zəruriliyi vurğulandı.
30-adək gənc tədqiqatçının iştirak etdiyi tədbir maraqlı müzəkirə və fikir mübadiləsi şəraitində keçib. Seminara gənc tədqiqatçılardan əlavə, Odlar Yurdu Universitetinin bir neçə bakalavrı və magistri fəal şəkildə qatılıb.
Xatırladaq ki, GPM tərəfindən təşkil olunan "Gənc Tədqiqatçıların Elmi Potensiallarının Artırılması” (GTEPA) adlı layihə müxtəlif elm sahələri üzrə elmi tədqiqatlar aparan magistr, dissertant və dokotorantlar, gənc alimlər və ümumiyyətlə elmi tədqiqata meyilli olan potensial gənc tədqiqatçılara müasir interdisplinar tədqiqat metodlarının öyrədilməsi və təcrübədə tətbiq edilməsinin təmin edilməsi məqsədi ilə həyata keçirilir. Layihədən ümumilikdə 50 gənc elmi tədqiqatçı faydalanmaqdadır. Layihə ilin sonunda Odlar Yurdu Universiteti ilə GPM-nin birlikdə keçirəcəyi böyük elmi-praktik konfransla yekunlaşacaq.
Bildirək ki, layihə çərçivəsində növbəti seminar 12 dekabr 2014-cü il tarixində saat 11:00-da Odlar Yurdu Universitetinin kiçik akt zalında keçiriləcək.
Gənc Politoloqlar Mərkəzi
|
|
|
(azadaz.com)
Xəbərdən istifadə edərkən istinad etmək vacibdir.
