Respublikamız müstəqillik əldə etdikdən sonra tullatıların idarəolunması sahəsində mövcud problemlərin həll olunması istiqamətində təxirəsalınmaz tədbirlər ğörülməyə başlanılmışdır. Sumqayıt şəhərində ən ciddi və uzun müddət həllini tapmayan ekoloji problemlərdən biri, "Səthi aktiv maddələr” zavodu ərazisində xlor istehsalı zamanı əmələ gələn 200 min tondan çox təhlükəli tullantı olan civəli şlamın açıq duz anbarında uzun müddət saxlanılması və bu səbəbdən ətraf ərazilərin civə ilə çirklənməsinə yol verilməsi idi. Ulu öndər Heydər Əliyev bu problemin həll olunması üçün maliyyə köməyi edilməsindən ötrü Beynəlxalq Bank qarşısında məsələ qoymuş və bank Sumqayıtda civəli şlamın basdırılması üçün xüsusi poıiqonun tikintisinə kredit ayırmışdır. Beynəlxaq standartlara cavab verən təhlükəli tullantılar poliqonu istifadəyə verilmişdir. Bu problem artıq öz həllini tapmış, tullantılar Sumqayıt şəhərinin yaxınlığındakı ETSN-nə məxsus təhlükəli tullantılar poliqonuna daşınmış və ekoloji təhlükəsizlik şəraitində basdırılması təmin olunmuşdur. Eyni zamanda, kimya müəsssələrinin ərazilərində üzün illər ərzində yığılıb qalan xlorparafinlər, latekslər, plastifikatorlar, poliqliserin məhsulları da yığılaraq təhlükəli tullantılar poliqonuna utilizasiya olunması üçün daşınmışdır.

Sumqayıt şəhərində uzun müddət həllini gözləyən məsələlərdən biri də "Azərboru” ASC-də marten sobasında əmələ gələn istehsal tullantısı olan şlakın şəhərin 76-cı məhəllə ərazisində yığılaraq qalması idi. Nəhayət, 2019-cu ildə "AzPal” MMC tərəfindən marten şlakının utilizasiya işlərinə başlanılmasıdır. Bu da şəhərdə ekoloji vəziyyətin sağlamlaşmasına xidmət edir.

Sumqayıt şəhərində formalaşan bərk məişət tullantılarının toplanması, daşınaraq məişət tullantıları poliqonunda zərərsizləşdirilməsi işlərini "Sumqayıt şəhər Təmizlik Departamenti" MMC həyata keçirir. Sumqayıt şəhərində 2019-cu il ərzində 624 000 m3 məişət tullantısı əmələ gəlmişdir. Hal-hazırda cəmiyyət Sumqayıt şəhəri, şəhərətrafı ərazilər, Abşeron rayonunun Xırdalan şəhəri və bir neçə qəsəbədə formalaşan bərk məişət tullantıları müqavilə əsasında daşınaraq Sumqayıt məişət tullantıları poliqonunda zərərsizləşdirilməsi üçün qəbul edilir. İl ərzində 970 000 m3 məişət tullantısı daşınaraq məişət tullantıları poliqonunda zərərsizləşdirilmişdir.Poliqon ərazisinə tullantıların daşınmasına keçən əsrin 50-ci illərindən başlanılmışdır.

Sahəsi 110 ha olan Sumqayıt şəhər "Təmizlik Departamenti” MMC-yəməxsus məişət tullantıları poliqonunun bir hissəsinə (təqribən 70 ha) 1999-cu ilə qədər bərk məişət tullantıları toplanmış, digər hissəsi isə boş sahə olduğundan uzun illər Sumqayıt sənaye müəssisələrində əmələ gələn bərk və maye halda istehsalat tullantıları həmin əraziyə atılmışdır. Hal-hazırda poliqon ərazisinə təhlükəli istehsal tullantılarının atılmasının qarşısı alınmışdır. Poliqon ərazisində tullantıların zərərsizləşdirilməsi üçün xüsusi qurğu vəşərait olmadığından tullantılar primitiv üsulla ətraf mühitdən təcrid olunmadan və texnoloji qaydalara riayət edilmədən texniki vasitələrin köməyi ilə basdırılır.

Poliqonda müxtəlif tip tullantılar olduğundan təbii proses nəticəsində əmələ gələn qazların öz-özünə alışması, həmçinin kənar şəxslərin poliqon ərazisinə müdaxiləsi nəticəsində ərazidə yanma hadisələri baş verirdi. Bunun nəticəsidir ki, yanma zamanı atmosfer havasına mənşəyi məlum olmayan müxtəlif növ zərərli qazlar atılır, spesifik iy-qoxu ətrafa yayılaraq, əhalinin haqlı narazılığına səbəb olurdu. Son illər şəhər rəhbərliyinin gördüyü tədbirlər nəticəsində poliqon ərazisində tullantıların yanması hallarına nadir hallarda rast gəlinir. Hazırda poliqon ərazisində əsasən plastik, karton, metal, şüşətullantılarının təkrar xammal kimi istifadə olunması üçün çeşidlənməsi işləridə görülür .Çeşidləmə işləri xüsüsi avadanlıq olmadıgından hələki əl ilə aparılır. Toplanmış materiallar təkrar emal sexlərinə verilir. Bu məsələ də yaxın zamanlarda öz həllini tapacaqdır. Azərbaycan Respublikası Prezidentinin 2018-ci il 1 noyabr tarixli sərəncamı ilə təsdiq olunmuş "Azərbaycan Respublikasında bərk məişət tullantılarının idarə olunmasının təkmilləşdirilməsinə dair 2018-2022-ci illər üçün Milli Strategiya" qəbul olunmuşdur.Milli Strategiyada respublikamız ərazisində bərk məişət tullatılarının idarə olunması sahəsində tədbirlərin görülməsi nəzərdə tutulmuşdur. Artıq Nazirlər Kabineti tərəfindən Abşeron rayonunda məişət tullantıların emalı üçün regional tullantı poliqonunun tikintisi üçün 65 ha. torpaq sahəsinin ayrılması nəzərdə tutulmuşdur. Hal-hazırda bu istiqamətdə işlər aparılır.