Bəs onlar işinin öhdəsindən nə dərəcədə gəlir? Ümumiyyətlə xüsusi karantin rejimində Sumqayıt polisi mühafizə və yoxlama fəaliyyəti necə təşkil edilir?

Mövzu ilə əlaqədar Sumqayıt şəhər Polis İdarəsinin İctimai təhlükəsizlik şöbəsinin rəisi, polkovnik - leytenant Nizami Paşayev Xeberle.com-a danışıb. O bildirib ki, Sumqayıt şəhər Polis İdarəsinin əməkdaşları səhhətini təhlükəyə ataraq, vətəndaşlarımızın sağlamlığının keşiyini çəkməkdə, virusa yoluxma riskini azaltmaq üçün xüsusi karantin rejimi qaydalarına ciddi riayət edilməsinə nəzarət etməkdədir: "Azərbaycan polisi xidməti borcunu layiqincə yerinə yetirməklə yanaşı, çətin vəziyyətdə olan insanların köməyinə də çatır, onlara yardım əli uzadır. Sumqayıt polisləri də bu çətin dövrdə şəhər əhalisinin yanında oldu. İstər sakinlərə qoruyucu vasitələrin paylanılması, istərsə də maddi imkanları aşağı olan ailələrə yardım edərək, karantin qaydalarına ciddi nəzarət edilməsi də şəhər əhalisi tərəfindən təqdirəlayiq hal kimi qiymətləndirilir. Günümüzdə şəhər ərazisində sutka ərzində iki növbəli xidmət təşkil olunub, həmçinin də 300 nəfərdən ibarət patrul qrupu yaradılıb ki, onlardan 200 nəfəri Daxili Qoşunların, 100 nəfəri isə polis əməkdaşı olub. Eyni zamanda şəhər daxilində axşam saat 20:00- dan səhər saat 8-ədək fəaliyyət göstərən 20 dayanıqlı post təşkil olunub, həmin postlarda xidmət göstərən 90 nəfər polis və Daxili Qoşun əməkdaşları da gediş-gəlişə və nəqliyyat vasitələrinə nəzarət edib", - deyə İdarə rəsmisi qeyd edib.

Nizami Paşayev həmçinin söyləyib ki, xüsusi karantin rejimi başlayan gündən indiyədək 3200 hərəkət iştirakçısı barəsində İnzibati Xətalar Məcəlləsinin 211-ci maddəsininin tələblərinə əsasən 300200 (üç yüz min iki yüz) manat məbləğində inzibati protokol tərtib olunub ki, həmin protokollar üzrə dövlət büdcəsinə 37 min 500 manat vəsait ödənilib: "14 nəfərə isə karantin qaydalarını kobud şəkildə pozduğu üçün inzibati həbs cəzası tətbiq olunub. Ümumilikdə xüsusi karantin rejimi dövründə 1000-dən çox vətəndaşa qoruyucu maska paylanılıb və maddi imkanları aşağı olan ailələrə humanitar yardımlar edilib".

Xatırladaq ki, mayın 18-dən etibarən digər şəhərlərdə olduğu kimi, Sumqayıtda da xüsusi karantin rejimi çərçivəsində tətbiq edilən məhdudiyyətlərin  bir qismi yumşaldılıb.

Xədicə Səxavətqızı

Xeberle.com