Sumqayıt sakinləri daha çox hansı super marketlərdən əliboş dönüblər?

Sumqayıtda "Səba” broylerin "Səxavət günü" kampaniyası başa çatdı. Amma nədənsə alıcılar bu xəbəri məhz kampaniyanın keçirildiyi gün bildilər. Məlumat üçün bildirək ki, hər ayın 15-də "Səba” broyler şirkətinin "Səba səxavəti günü" kampaniyası keçirilir. Sumqayıt sakinləri artıq neçə aydır kampaniyadan yararlanaraq şirkətin məhsullarını ucuz qiymətə alırdılar. Ənənəvi olaraq bu dəfə də yəni, dekabr ayının 15-də kampaniyanın keçirildiyi super marketlərin qarşısında müştərilər növbə tutaraq iş vaxtının başlamasını gözləyirlər. Yalnız marketlərdə iş vaxtı başladıqdan sonra müştərilərə bildirilir ki, bu aydan etibarən "səxavətli şirkət"in kampaniyası artıq başa çatıb. Alıcılar bu xəbəri nə üçün məhz səhər saatlarında - kampaniyanın bitdiyi gün biliblər? "Səba” broyler şirkəti kampaniyanın keçirildiyi super marketlərə öncədən xəbərdarlıq etməyibmi? Edibsə, marketlər alıcılarını qapının ağzında boş yerə vaxtlarını sərf edib gözləməmələri üçün xəbərdarlıq edə bilərdilər. Ən azında marketin şüşəsinə kampaniyanın başa çatdığın bildirən elan da yerləşdirmək mümükün idi.
"Səba” broyler şirkətinin satış üzrə meneceri Rövşən Hüseynov Xeberle.com-a açıqlamasında kampaniyanın başa çatdığı barədə super marketlərə əvvəlcədən xəbər verdiklərini söylədi: "Bu barədə alıcılar məhz kampaniyanın keçirildiyi gün xəbərdar olublarsa, bunun üçün şirkət günahkar deyil. Artıq şirkətin daxili imkanları kampaniyanı davam etdirməyə imkan vermir. Ona görə də kampaniya dekabr ayından etibarən dayandırıldı”.
Satış menecerinin dediyinə görə, "Səba” şirkətinin 2015-ci ildə kampaniyanı yenidən davam etdirəcəyi güman edilmir.
Bu gün daha çox alıcının əliboş qayıtdığı "Bazar store” olduğuna görə super marketin müdiri Anar bəyə müraciət etdik. Market müdiri bizə tövsiyə etdi ki, suallarınızla bağlı baş ofisə müraciət edin: "Kampaniya ilə bağlı hər hası bir məlumat bizə deyil, baş ofisə daxil olur”, - deyərək açıqlama verməkdən imtina etdi.

Aytən Əli
Xeberle.com