Son dövrlərdə Avropa və MDB dövlətlərindən Azərbaycana gətirilən duz məhsullarının tərkibində yod çatışmazlığı aşkar olunub.

Bu barədə açıqlama verən Azad İstehlakçılar Birliyinin sədri Eyyub Hüseynov ofisdə həmin duzlardan ibarət böyük bir "kolleksiya"nın toplandığını bildirib. 

Ekspertin sözlərinə əsasən, ölkədə yod xəstəliklərinin qarşısını almaq məqsədilə "Duzun yodlaşdırılması haqqında” qanun qəbul olunsa da, bu qanunun icra mexanizmi həyata keçirilmir: "Bu qanunun 8.3 maddəsi əsasında yodsuz duzun istehsalı, idxalı, hətta yem məqsədilə heyvanlara verilməsi qadağan olunub. Bununla belə, hazırda bazarlarda satılan duzun 10%-nin mənbəyi məlum deyil. Bunların bir çoxu Ukraynaya məxsus "Artyomsol” və "Bastsol” əmtəə nişanları ilə satılır. Şəki, Salyan və Neftçala rayonları ətrafında yerləşən göllərdən duzun yığılaraq bələdiyyə və digər dövlət orqanlarının gözü qarşısında pendir və çörəkbişirmə sexlərinə verilməsi ilə bağlı əlimizdə xeyli fakt var. Bir neçə gün əvvəl ofisə Sumqayıtda yodsuz və təhlükəli, naməlum göllərdən yığılmış, hətta yollara səpilmək üçün istifadə olunan duzların qablaşdırılaraq bazarlarda və marketlərdə satışının təşkil edildiyi ilə bağlı məlumat daxil olub. Vətəndaşlara müraciət edərək bildiririk ki, bazarlardan və ya marketlərdən duz alarkən ehtiyatlı olsunlar, çünki bu məhsullar sonradan insan orqanizmində müxtəlif xəstəliklərin yaranmasına səbəb olur."

AİB sədri bu yaxınlarda paytaxtdakı "Kontinental” marketdə Almaniyadan gətirilmiş yodsuz duzların satışına rast gəldiklərini də vurğulayıb: "Bu məhsullardan bəzi nümunələr götürərək ofisimizə gətirmişik. Hazırda bununla bağlı araşdırmalar aparılır.

Toplanan nümunələr BMT-nin AİB-yə verilən laboratoriya testləri vasitəsilə yoxlanılır. Sonra bu nümunələr səhiyyə orqanları və Birliyin 30 rayonda yerləşən ofislərinə göndərilir." (SalamNews.org)