Bu günlərdə Sumqayıt şəhər 29 saylı orta məktəbin 11-ci sinif şagirdləri ilə məktəb direktoru Vəfa Məmmədova arasında gedən "Vinetka” qalmaqalından bəhs edən xəbərlər bir sıra informasiya saytlarında yer alıb, valideyn Sona Aslanovanın məktəbdə baş verənlərlə bağlı müraciəti işıqlandırılıb. S.Aslanoba bildirib ki, şagirdlər xatirə "Vinetka”sı hazırlamaq üçün, bir fotoqrafla münasib qiymətə razılaşıblar. Amma sonradan məktəb direktoru tələb edib ki, "vinetka”nı onların seçdiyi fotoqraf deyil, məhz direktorun məsləhət gördüyü fotoqraf hazırlayacaq. Bu söhbətdən sonra şagird və direktor arasında qalmaqal yaranıb. Valideyn münaqişənin ciddi problemlərə səbəb ola biləcəyindən narahat olduğunu da, xüsusi olaraq qeyd edib.

Təhsilə aidiyyəti olmayan bir məsələ üzündən məktəbdə yaşanan xoşəgəlməyən vəziyyətlə bağlı Sumqayıt şəhər Təhsil Şöbəsinin müdiri Vaqif Ələkbərova müraciət etdik. Vaqif müəllim söylədi ki, məsələni yaxından araşdırb: "Dərs ilinin ortasında "Vinetka” hazırlamırlar. Bunun üçün dərs ilinin sonunu gözləmək lazımdır. Yaxşı olar ki, şagirdlər oturub dərslərini oxumaqla məşğul olsunlar."

Təhsil şöbəsinin müdiri əlavə etdi ki, belə məsələlər məktəb direktoru deyil, valideyn komitəsi və sinif rəhbəri arasında həll edilməlidir: "Məktəbə kənardan daxil olan fotoqraflar özlərina aid olmayan şəkillər çəkməyə maraq göstərirlər. O üzdən məktəb direktorlarının tanımadıqları fotoqrafların məktəbə girmələrindən ehtiyat etmələri normaldır."

Vaqif Ələkbərov 29 saylı məktəbdə artıq hər şeyin öz qaydasında olduğunu, mübahisənin təhsil prossesinə heç bir təsir göstərməyəcəyini də bildirdi.

Aytən Əli
Xeberle.com