Pandemiya ilə mübarizə tədbirləri çərçivəsində maarifləndirici aksiyalar davam edir.
Budəfəki maarifləndirici aksiya Sumqayıt şəhərində iri ticarət mərkəzlərində həyata keçirilib.
İqtisadiyyat Nazirliyinin təşəbbüsü, Kiçik və Orta Biznesin İnkişafı Agentliyinin təşkilatçılığı, Sahibkarlar Təşkilatları Milli Konfederasiyasının və özəl sektorun dəstəyi ilə vətəndaşların koronavirus infeksiyasının profilaktikasına dair maarifləndirilməsi tədbirlərinə dəstək məqsədilə iri marketlərdə və banklarda müştərilərə tibbi maskalar paylanılıb.
Azərbaycan Sahibkarlar Konfederasiyası şöbəsinin sədri Şahin Məmmədovun sözlərinə görə, aksiya çərçivəsində KOB dostları və könüllülər tərəfindən xidmət, ticarət obyektlərində vətəndaşlarla xüsusi karantin rejimi qaydalarına dair maarifləndirici söhbətlər aparılıb, "Gilan Tekstil Park” MMC-nin istehsalı olan 2 min ədəd tibbi maska paylanılıb: "Düşünürük ki, burada sahibkarlar vətəndaşlara demək istəyir ki, maska taxın, öz sağlamlığınızı qoruyun və karantin müddətində müəyyən olunmuş tədbirlərə riayət edin. Sumqayıt əhalisi artıq, özünüz də gördüyünüz kimi bu tədbirlərə ciddi əməl etməyə çalışır. Və düşünürük ki, sahibkar, dövlət və əhali bu bəlaya birlikdə qalib gələ biləcək”.
İndiyədək Sumqayıt şəhəri də daxil olmaqla, Abşeron rayonunun Xırdalan şəhərində və Qaradağ rayonunun Lökbatan qəsəbəsində, Masallı, Lənkəran, Astara, Neftçala rayonlarında təşkil olunmuş aksiyalar çərçivəsində 9 minə yaxın tibbi maska paylanılıb.
Dövlət-biznes əməkdaşlığı çərçivəsində həyata keçirilən maarifləndirici aksiya ölkənin 20-yə yaxın şəhər və rayonunu əhatə edəcək.
Xəbərdən istifadə edərkən istinad etmək vacibdir.
