"TANAP-ın perspektivi iqtisadi məsələdən çox siyasi məsələdir”.

Bu sözləri açıqlamasında politoloq Ərəstun Oruclu söyləyib.

O, TANAP-ın taleyinin Azərbaycan-Avropa Birliyindən asılı olduğunu bildirib:

"Hələ də inanmıram ki, Qərb TANAP-a bu qədər böyük önəm verir. Bu, hələ tam aydın deyil. Burada aydın olmayan məqamlardan biri də Türkiyənin mövqeyidir. Putin tərəfindən "Türk axını” adlandırılan kəmərin Türkiyədən keçməsi nəzərdə tutulur. Buradan həm də TANAP keçəcək ki, onlar da rəqib layihələrdir. Ona görə bilinmir ki, sabah Türkiyənin qarşına Rusiya tərəfindən bu iki layihədən birinin seçilməsi ilə bağlı şərt qoyula bilər, ya yox. Aydın məsələdir ki, 20 milyardla 62 milyard kub metr arasında fərq var. Rusiyanın əlində TANAP-a mane olmaq üçün digər imkanlar - Gürcüstanda sabitliyi pozmaq, Gürcüstan hökumətinə təsir etmək və s. – var. Yekunda yenə də hər şey Avropa Birliyinin mövqeyindən asılıdır. Avropa Birliyi kimə üstünlük verəcək? Məsələn, Brüssel DESFA şirkətinin səhmlərinin alınması məsələsində maneçilik törətdi. Bu da təbiidir. Əslində, Avropa Birliyinin vahid enerji siyasəti mövcuddur. Bu siyasət isə təkcə Avropa Birliyi tərəfindən deyil, həm də ABŞ tərəfindən dəstəklənir. Ona görə də TANAP-ın perspektivi iqtisadi məsələdən çox siyasi məsələdir. Bu, Rusiya-Avropa, Rusiya-Qərb, Azərbaycan-Qərb münasibətlərinin necə inkşaf edəcəyindən daha çox asılıdır. Fikrimi bir daha tamamlayaraq deyirəm ki, TANAP-ın taleyi Azərbaycan-Rusiya münasibətlərindən çox, Azərbaycan-Avropa Birliyi münasibətlərindən asılıdır. Bakı-Moskva münasibətlərində hər şey aydındır, çünki TANAP Kremlin maraqlarına ziddir”.  (axar.az)