Bir neçə həftə öncə şəhərin ikinci böyük bazarı sayılan "Şərq” bazarının ətrafının bərbad vəziyyətindən, bu ərazinin Sumqayıtın ümumi inkişaf tempindən geri qalmasından bəhs etmişdik. Yol dağ kəndlərinin yolları kimi, ətraf natəmizlik, üstəgəl səki və maşın yolunda ticarət piştaxtaları.

Bazarın müdiri Rəşid Babayev məsələ ilə bağlı bunları demişdi:
"Yolun içində alver edənlərin bazara heç bir aidiyyatı yoxdur. Onlar bazara icarə haqqı ödəmirlər, ora qətiyyən bazara aid deyil. Bazarın ərazisindəki bir çox sahibkarlar işlətdikləri obyektlər bazara aid olduğu halda bazara icarə haqqı ödəmirlər. Qaldı ki,yolda ticarətlə məşğul olanlar. Yolun o cür zəbt olunması, yolun o vəziyyətdə olması bizim də ürəyimizcə deyil”.

Küçə ticarəti ilə mübarizə polisə aid məsələ olduğundan ərazinin sahə müvəkkilinin də münasibətini öyrəndik.
Polis mayoru Mikayıl Mikayılov bildirdi ki, küçə ticarəti ilə məşğul olan vətəndaşlar cərimələnib: "Səkidə, yolda ticarətlə məşğul olan ticarətçilər barədə protokollar yazılıb, müvafiq strukturlara göndərilib, onlar 85 manat cərimə edilib. Yenidən əraziyə baxış keçirərik, nəzarəti gücləndirərik"

 Vüsal
(168saat.com)