Ekologiya və Təbii Sərvətlər Nazirliyi tərəfindən "Ovçuluq haqqında” Azərbaycan Respublikası Qanununun tələblərinə əməl olunması vəziyyətinin araşdırılması məqsədilə dekabrın 12-dən 24-dək ölkə ərazisində keçirilmiş reydlərin nəticələri açıqlanıb. 

Xeberle.com  nazirliyin saytına istinadən xəbər verir ki, reyd zamanı Şahdağ Milli Parkının Quba bölməsinin ərazisində qanunsuz ovla məşğul olan Sumqayıt şəhər sakinləri Hüseyn Hüseynov, Rövşən Abulov, Şakir Qəhrəmanov, Vəli Hüseynov, Məhəmmədəli Niyazov saxlanılıblar. Qanun pozucularından 6 ov tüfəngi götürülüb və ümumilikdə onlara 6000 manat məbləğində cərimə tətbiq edilib.

Eyni zamanda, həmin ərazidə keçirilmiş növbəti reyd zamanı ovla məşğul olan naməlum şəxs nazirliyin əməkdaşlarını görən kimi ov tüfəngini ərazidə qoyaraq qaçıb. Ov silahı götürülərək qanunamüvafiq qaydada akt tərtib olunub və təqsirkarın şəxsiyyətinin müəyyən edilməsi üçün aidiyyəti üzrə rayon polis şöbəsinə müraciət edilib.

Xeberle.com