Azərikimya” İB-də talassemiyalı xəstələr üçün növbəti qanvermə aksiyası yüksək fəallıqla keçib.

Birlikdən Xeberıle.com-a verilən məlumata görə, ARDNŞ-in "Azərikimya” İstehsalat Birliyində "Hemofiliya və talassemiyadan əziyyət çəkən uşaqlara qayğı” Dövlət Proqramı çərçivəsində talassemiyalı xəstələr üçün yeni il ərəfəsində növbəti qanvermə aksiyası keçirilib.

"Azərikimya” İB-nin dəvəti ilə B.Eyvazov adına Respublika Hematologiya və Trans-fuziologiya İnstitutunun Mərkəzi Qan Bankı tərəfindən ezam olunub, hər birində 10 nəfər olmaqla iki xüsusi tibb briqadası tərəfindən aparılan və iki gün davam edən budəfəki qanvermə aksiyasının birinci günündə Birliyin Etilen-polietilen zavodunun və Təmir-tikinti İdarəsinin işçıləri, növbəti gün isə Birliyin Baş ofisinin rəhbərliyi və əməkdaşları qan xəstəliklərindən əziyyət çəkən uşaqlar üçün qan veriblər. Qanvermə aksiyasından əvvəl hər bir könüllü donor-kimyaçının qan sağlamlığı yerindəcə təşkil olunmuş səyyar laboratoriyada yoxlanılıb, yalnız bundan sonra qan götürülüb.

"Azərikimya” İstehsalat Birliyində artiq 4-cü dəfədir ki, keçirilən, azyaşlı həmvətənlərimizə yardım məqsədi daşıyan və minlərlə insan üçün həyati əhəmiyyət kəsb edən bu könüllü hümanitar aksiyada kimyaçılar yüksək fəallıqla iştirak edib və 400 nəfərdan artıq əməkdaş qan verib.