Azərbaycanda "Halal” nişanı ilə satılan ət və ət məhsullarının çeşidi son zamanlar artmaqdadır. Ölkədə kolbasa istehsalı ilə məşğul olan kifayət qədər sex və müəssisə mövcuddur ki, hər biri öz məhsulunun halal olmasını iddia edir. Belə məhsula üstünlük verənlər də halal adı ilə satılan məhsullardan alır. Amma sonradan məlum olur ki, məhsul heç də halal deyilmiş. Məsələn, kolbasa istehsalı ilə məşğul olan sex və ya iri həcmli şirkətlər ət və ət məhsullarının çeşidinin hazırlanmasında bəzən bilərəkdən, bəzən də bilmədən bu standartları pozurlar. Bu yaxınlarda ət və ət məhsulları istehsal edən firmalardan birinin "Halal” adıyla satdığı kolbasanın tərkibindən donuz və donuz piyi aşkarlandı. Göründüyü kimi işbazlar vətəndaşların mənəvi hissləri ilə oynayaraq halal olmayan məhsullarını satmaq üçün bu cür iyrənc üsullardan istifadə edirlər. Burda məqsəd birdir, qaz vurub qazan doldurmaq istəyi... Bəs görəsən belə ərzaq məhsullarını alıb yeyən adamlar necə, günaha batırmı?

İlahiyyatçı Bərhuz Camal bildirir: "Çox vaxt kolbasa alırsan, üzərində "halal" yazılır. Sonradan araşdıranda məlum olur ki, heç də halal deyil, tərkibində donuz əti var. Bir məhsulun halal və ya haram olmadığını bilmiriksə və üzərindəki halal etiketinə etimad edib alırıqsa, bu insan şəri öhdəçilikdən azad edir. Amma bilirik ki, hazırda "halal" etiketləri bir brendə çevrilib və onun şəriət baxımından halal olmasına çox az istehsalçılar diqqət edir."

Bəhruz Camal hesab edir ki, indi müsəlmanlar halal adı ilə aldıqları məhsulun halallığından əmin olmaq üçün özləri onun istehsalı ilə maraqlanmalıdırlar. O, insanları aldadanların böyük əzaba düçar olacağını vurğuladı: "Camaatı "halal" adı ilə aldadıb onlara islami kəsim qaydalarına uyğun omayan məhsulları satan istehsalçıların Allah qarşısında günahları böyükdür. Çünki onlar camaatı aldadr və yalançıdırlar.” (analitik.az)