Azərbaycanın daha da yaxından tanıdılması, Türkiyə-Azərbaycan münasibətlərinin daha da inkişaf etdirilməsinə töhfə vermək, bu istiqamətdə fəaliyyət göstərən qurum və fərdlərin dəstəklənməsi, həmçinin Azərbaycandan gəlib İzmir Universitetlərində təhsil alan tələbələrin təhsillərini daha da uğurlu bir şəkildə başa vurmalarına dəstək məqsədi ilə təsis edilən Azərbaycan Qardaşlıq və Əməkdaşlıq Cəmiyyəti 31 Dekabr Dünya Azərbaycanlılarının Həmrəylik Günü münasibətiylə tədbir təşkil etdi. İzmirin ən gözəl guşələrindən biri olan Səfərihisar Euphoria Oteldə təşkil olunan tədbirdə cəmiyyətin idarə heyəti və üzvləri ilə yanaşı, qeyri-hökümət təşkilatlarının sədrləri, iş dünyasının nümayəndələri, İzmirdə fəaliyyət göstərən azərbaycanlı müəllim və müxtəlif peşə sahibləri ilə çox sayda Azərbaycanın dostu olan şəxslər iştirak etdi. 31 Dekabr Dünya Azərbaycanlılarının Həmrəylik Günü haqqında iştirakçılara məlumat veriləndən sonra söz alan cəmiyyət sədri dr. Asif Qurban qonaqları salamladıqdan sonra cəmiyyətin cari və gələcək planları haqqında məlumat verdi, cəmiyyətin bundan sonra da önəmli və qalıcı fəaliyyətlər həyata keçirəcəyini vurğuladı. O, bunun üçün hər kəsi cəmiyyət ətrafında sıx birləşməyə dəvət etdi. Daha sonra cəmiyyətin idarə heyətinin verdiyi bir qərar haqqında tədbir iştirakçılarına məlumat verildi. Bu, ilk əvvəl İzmirdə, daha sonra Türkiyədə olmaq üzərə, il ərzində müxtəlif sahələrdə fəaliyyət göstətən şəxs və qurumlardan öz fəaliyyətlərində Azərbaycanla bağlı işlər görənləri seçərək onları o ilin Azərbaycan Dostu mükafatı ilə mükafatlandırılması qərarı idi. Cəmiyyət 2014 ili üçün bir qurum və bir şəxsi bu mükafata layiq görmüşdür. Qurum olaraq, öz fəaliyyətlərində Azərbaycan və Türk Dünyasına önəmli yer verən və bu il İzmirdə 40-a yaxın cəmiyyətin bir araya gələrək təşkil olunan Xocalı Platformunun təşkilatçılarından biri olan Zəkariya Doğan Mədəniyyət Təhsil və İdman Cəmiyyəti seçilmişdir. "2014 İli Azərbaycan Dostu Qeyri-Hökümət Təşkilatı” mükafatı cəmiyyətinin sədri Kenan Doğana Asif Qurban təqdim etdi. Kenan Doğan bu mükafatı almasından məmnun olduğunu, bundan sonra da bu yöndə fəaliyyətlərinə dəvam edəcəyini və Azərbaycan Cəmiyyəti ilə də əməkdaşlıq etmək istədiyini ifadə etdi. Digər mükafata isə İzmirdə fəaliyyət göstərən, geniş bir dinləyici kütləsinə sahib olan Can Radioda siyasət üzrə veriliş hazırlayan və aparan Doğan Beyazgül layiq görüldü. "2014 İli Azərbaycan Dostu Media İşçisi” mükafatını Müstəqil Sənayici İş Adamları Assosasiyası İzmir Şöbəsi sədr müavini Hakan Şəkərci təqdim etdi. Doğan Beyazgül də mükafat üçün təşəkkür edərək müxtəlif zamanlarda Türkiyə mətbuatında Azərbaycan əleyhinə çıxışlar olduğu və son dönəmlərdə erməni tərəfdarlarının aktivləşdiyini vurğuladı və bundan sonra da var gücümlə Azərbaycan gerçəklikərinin Türkiyə insanına çatdırılması üçün çalışacağam deyə ifadə etdi. Tədbirdə iştirak edən qonaqlar İstanbulda yaşayan, "O SəsTürkiyə” yarışmasında Azərbaycanı laiqincə təmsil edən, gənc sənətçi Elgün Guliyev və İzmirdə hər zaman Azərbaycan musiqisinin təbliğində böyük əməyi olan sənətçi Erdal Baydarın doyumsuz musiqiləri ilə əyləncəli anlar yaşadılar. Tədbir eyni zamanda insanların bir-birləri ilə tanışmaları, yeni əməkdaşlıqların qurulması ilə də yadda qaldı.

Xeberle.com