Sumqayıt şəhər Gənclər və İdman Baş İdarəsinin təşkilatçılığı ilə 31 Dekabr – Dünya Azərbaycanlılarının Həmrəylik Günü və Yeni il bayramı münasibətilə silsilə tədbirlər həyata keçirilib. İdarədən Xeberle.com-a verilən məlumata görə, şəhərin idman ictimaiyyətinin nümayəndələrinin, eləcə də müxtəlif sahələri təmsil edən yaradıcı və ictimai fəal gənclərin iştirakı ilə bədii-əyləncəli bayram tədbirləri baş tutub.

Tədbirlərdə şəhər Gənclər və İdman Baş İdarəsinin rəisi Elşən Baxşəliyev 31 Dekabr – Dünya Azərbaycanlılarının Həmrəylik Günü və Yeni İl Bayramı münasibəti ilə iştirakçıları səmimi qəlbdən təbrik edib, fəaliyyətlərində uğurlar arzulayıb. O, ötən il ərzində gənclərlə iş və idman sahələrində görülmüş işlərdən, əldə edilmiş nailiyyətlərdən danışıb. İdarənin rəisi əldə olunan nailiyyətlərin ölkə başçısı İlham Əliyevin diqqət və qayğısı sayəsində mümkün olduğunu xüsusilə vurğulayıb.

Tədbirlər zamanı 2014-cü ildə Dünya və Avropa birincilik və cempionatlarında, Kubok yarışlarında yüksək nailiyyətlər əldə etmiş idmançı və məşqçilərə, həmçinin ictiami fəallığına görə Ə.Əliyev adına Sumqayıt Tibb Kollecinin bir qrup tələbə gəncinə Baş İdarənin fəxri fərmanları və hədiyyələri təqdim olunub.

Tədbirlər rəngarəng musiqi nömrələrindən və maraqlı viktorinalardan, gənclərin ifasında mahnı və şeirlərdən ibarət bədii hissələrlə davam edib.

Xeberle.com