Avropa jurnalistləri arasında seçim edilərək cəmi 12 jurnalistin yazısı 86 dilə tərcümə olunaraq, "Pandemic Journal online”da yayımlanıb.

 

Onlardan biri Azərbaycanı təmsil edən Xeberle.com saytının baş redaktoru Ramil Zeynallıdır.

Ramilin "Azərbaycanlı həkimin hekayəsi” adlanan məqaləsində Sumqayıt şəhərindəki 3 saylı poliklinikanın həkimi, iyun ayından könüllü olaraq pandemiya xəstəxanasında çalışan Kəmalə Nəbiyeva haqqındadır. İndiyə qədər onlarla ağır xəstənin sağalaraq evinə, ailəsinə qayıtmasına kömək etmiş Kəmalə xanımın dilindən monoloq şəklində söylənənlər yazının maraqlı alınmasında əsas rol oynayıb. Məqalədə həm ölkəmizdə günün bəlası sayılan koronavirusa qarşı mübarizə məqsədilə atılan addımlar­dan, həm də sıravi bir həkim-qadının bu mübarizədə fədakarlığından, onun tibb işçisi və insan kimi duyğu və düşüncələrindən bəhs edilir. "Koronavirus bitsə də, kaş ki, həkimlərə olan inam, hörmət bitməsin” – deyən Kəmalə Nəbiyevanın xəstələrə xeyir-duası, həmkarlarına tövsiyəsi yazıda səmimiyyətlə qələmə alınıb. Qeyd edək ki, həmin jurnal onlayn formatda da çıxdığı üçün Ramil Zeynallının məqaləsi çoxsaylı foto və video əlavələrlə birlikdə yayımlanıb.