Çoxdandır yazı yazmırdım. Əslində buna həm marağımın olmaması, həm də cəmiyyətdə baş verən hadisələrin mənfi aurası öz təsirini göstərirdi. Beynimdə “dəyirman bildiyini eləyər, çax-çax baş ağrıdar” məsəli at oynadır, yavaş-yavaş alışırdım baş verənlərə.

Amma son baş verən hadisə səbr kasasını əməlli-başlı daşırdı. Bir yeniyetmə qızın başına gələn müsibət məni çox sarsıtdı. Sumqayıtın 11 nömrəli orta məktəbinin 11-ci sinif şagirdi Nərminin tutulduğu ağır xəstəlik onun arzularının, istəklərinin üzərinə qara bulud kimi çökdü. Əslində bu xəstəliyin yaranmasına səbəb olan həkim o qızın arzularını və istəklərini puç etdi.

Həmin məktəbdə oxuyan şagirdlərlə söhbət edərkən öyrəndim ki, Nərmin əməliyyat olunduqdan sonra xəstəliyi daha da ağırlaşmış və fəlakətin son anına qədər gəlib çatmışdır. Deyilənlərə görə, onun əməliyyatı çox təhlükəli və riskli bir addım kimi atılmamalı imiş. Lakin...

Hippokratın davamçısı qəssab bir həkim ən rahat və sərfəli yol olan əməliyyatı seçərək gənc bir qızı ölümün pəncəsinə atdı. Ölkədəki səhiyyə sisteminin bərbadlığı barədə az-çox məlumatım var idi, ancaq buna baxmayaraq, ümid edir və inanırdım ki, hələ də savadlı loğmanlarımız var və onlar xalqın sağlamlığının keşiyində dayanırlar. Bəli, vicdanlı həkimlər istisna olmaqla, əksər “ağ xalatlı”lar pul kisələrinin keşiyində durur. Bu zaman hərislik qurbanı olan vətəndaşların sayı durmadan artır.

Daha sonra öyrəndim ki, Nərminin müalicəsi üçün 150 min manat vəsait lazımdır. Sağ olsun xeyirxah insanlar ciblərinə görə yardımlarını əsirgəmədilər. 20-30 min arasında məbləğ toplandı. Özü də görün, kimlərdən toplandı bu qədər pul? Tələbələr, şagirdlər, valideynlər, müəllimlər və digər sadə vətəndaşlar nəyə gücləri çatdısa, əsirgəmədilər. Halbuki, həmin məbləğin yığılması heç də qlobal problem deyildi. Xatırlayırsınızsa, Baloğlan Əşrəfovun xəstəliyi dönəmində necə böyük bir ajiotaj yaranmışdı. Niyə də yaranmasın, axı o xalqın sevimlisidir və xalq öz sevimlisi üçün heç nəyi əsirgəmədi.  Bəs Nərmin və onun kimi neçə-neçə insanlar bizim sevimlimiz deyilmi? Onları göz görə-görə ölümə nyə sürükləyirik. Axı dinimiz İslam da yaxşı əmələ səsləyir bizi. Gündə 5 dəfə oxunan azanda belə deyilir: “Hayyə əla xayril əməl”, yəni “Əməllərin ən xeyirlisinə tələsin”. Peyğəmbərimiz xeyir iş görməyi əmr etmişsə, hanı bizim müsəlmanlığımız və islamiyyətimiz?

Qafqazın şeyxi halal kolbasa üstündə mübarizəyə qalxıb. Bəs bu camaatın verdiyi nəzir-niyazlar, zəkat-sədəqələr hara xərclənir? Axı bu ödənclər sırf kimsəsizlər, yetimlər, xəstələr və imkansızlar üçün nəzərdə tutulub. Allahın qarşısında səcdəyə gedib, rükuda dayanan varlı-hallı məşədilər, hacılar bununla da öz ibadətlərini bitmiş hesab edirlər. Axı peyğəmbər Əfəndimiz “Özü tox olub, qonşusundan bixəbər yatan mənim ümmətimdən deyil” buyurub. Qonşum rus qadın pensiyasından 5 manat həmin qızın bank hesabına köçürdüyü halda,  siz harda qalmısınız?

Pulunu sağa-sola xərcləyib, eyş-işrətdən başı açılmayan, harın papanın gül balaları bu gün də qəlyan çəkib, 5 dənə “Red Bull” içməsəniz dünya dağılmaz ki?! Sizlər 100 minlik maşınlarda küçələrdə şütüyüb DYP-nin yanından kiminsə “şotuna” 120 ilə keçəndə yeniyetmə bir qız ölümlə pəncələşir. Sizlərin valideynləri bu cür “bespredel”liklərinizlərlə  fəxr edərkən Nərmin və onun kimilərin valideynləri nələr çəkir bilirsinizmi? Hardan biləsiniz axı?! Bilmək üçün gərək insanda ürək və vicdan olsun.

Sponsor axtarışında olub, gic-gic konsertlər verən, düşük bir titul üstündə brilyant üzüyə pul xərcləyən, bahalı maşınları və klipləri öyünən manıslar, “milyonlarla fanatım var” deyən əməkdar və xalq artistləri səsiniz gəlmir nəsə. Konsertlərinizdə dediyiniz “əlləri görmürəm”ifadəsini deyəsən, indi sizlərə demək lazımdır. Bu dəfə “əllər havaya” deyil, “əllər cibə” getsin.

Gördüyünüz kimi, həmin pulu yığıb verə biləcək kifayət qədər insanımız var, sadəcə insaniyyətimiz yox. Allah sizə rəhmət eləsin, Hacı Zeynalabdin və bir çox messenatlara. Yaxşı ki, bu günləri görmədilər. Allah Nərminə və digər ümidlə sağalmalarını gözləyən xəstlərimizə şəfa versin və kömək olsun!

 Elvin Babayev, xeberle.com

P.S. Bir yaxın dostumun söylədiyi fikir həqiqətən özünü doğrultdu: “Kasıba elə kasıbın özü, bir də Allahı qalacaq”.

P.S.S. Yeri gəlmişkən, Nərmini hava limanına aparan şanlı təcili tibbi yardımçılarımız zəhməthaqqı olaraq 780 manat pul alıblar. Buna isə deyiləsi söz tapmadım.