Apteklərdə bir dərmanın bir neçə növü satılır. Tərkibləri qismən eyni olsa da, həmin dərmanların adları və qiymətləri fərqlənir. Alıcılar da çox vaxt daha ucuz olanı alır. Ancaq bu yalnış seçim səhhətinizdə ciddi problemlərin yaranmasına səbəb ola bilər.

Vətəndaşların şikayətlərinə səbəb apteklərdə satılan əvəzedici dərmanlardır. Bəzən əczaçılar reseptə yazılan dərmanın əvəzinə eyni tərkibli, lakin başqa adda və qiymətdə olan dərmanı alıcıya təklif edirlər. Reseptdə qeyd olunmayan dərmanların satışından təkcə əczaçılar məsuliyyət daşımır. Belə ki, bir çox insan eyni tərkibli dərmanlardan daha ucuz olanını aptekdən tələb edir.

Həkimlər isə xəstələrə xəbərdarlıq edir. Əvəzləyici dərmanlar reseptdəkinə tərkibcə yaxın olsa da, tamamilə eyni deyil və ən xırda fərqlilik səhhətinizə ciddi ziyan vura bilər.

Bəzi apteklərdə tibbi təhsili olmayan şəxslər də satıcı kimi fəaliyyət göstərir. Odur ki, ehtiyatı əldən vermək olmaz. Satıcının təklif etdiyi dərmanla bağlı həkimə məlumat vermək və onun razılığından sonra həmin dərmanı almaq lazımdır.



(xezerxeber.com)