Azərbaycan Dövlət Yol Polisi qarlı hava şəraiti ilə bağlı sürücülərə xəbərdarlıq edib. Daxili İşlər Nazirliyi Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyevbildirib ki, sürücülər və avtomobil sahibləri yaxın günlərdə Azərbaycanda havaların qarlı, şaxtalı keçəcəyini nəzərə alaraq nəqliyyat vasitələrinin texniki vəziyyətinə xüsusi diqqət yetirməlidirlər.
Şöbə rəisi sürücülərə belə havalarda xüsusi qış təkərlərindən istifadə etməyi tövsiyə edib:
"Artıq respublikanın bir sıra bölgələrində qar yağacağı, yolların buz bağlayacağı barədə xəbərdarlıq edilib. Sürücülərə tövsiyə olunur ki, texniki vəziyyəti nasaz olan, şinləri normalara cavab verməyən avtomobillərlə yola çıxmasınlar”.
Onun sözlərinə görə, avtomobilin şinləri normalara cavab verməzsə, avtomobil yol hərəkətindən kənarlaşdırılacaq:
"Minik avtomobilləri üçün şinlərin protektorlarındakı naxışların qalmış hündürlüyü 1,6 mm, yük avtomobillərində 1 mm, avtobuslarda 2 mm, motosiklet və mopedlərdə isə 0,8 mm-dən az olmamalıdır. Həmçinin eyni ox üzrə müxtəlif naxışlı şinlərdən istifadə olunmamalıdır. Bu normalar gözlənilmədikdə həmin nəqliyyat vasitələrinin istismarı qadağan olunacaq və idarəetmədən kənarlaşdırılacaq”.
K.Əliyev, həmçinin qeyd edib ki, sürücülər bir daha avtomobildə antifrizin, şüşə silənin və s. vəziyyətinə diqqət yetirməli, qış üçün təkər və işıq faralarını uyğun hala gətirməlidir. Sürücülər xüsusilə yağıntı düşən, yolların buz bağladığı ərazilərdə sürət həddini meteoroloji və yoldakı şəraitə uyğun seçməlidirlər.
Şöbə rəisi əlavə edib ki, yanacaqdoldurma çənlərinin maksimum həttə dolu olması tövsiyə olunur, çünki sürücü qar və müxtəlif səbəblərdən yolda qala bilər, o zaman o mühərriki bir neçə saat işlədib avtomobilin içində sərnişinləri qızdıra bilər. (sia.az)
Xəbərdən istifadə edərkən istinad etmək vacibdir.
