Bakı şəhəri Suraxanı rayonu ərazisində yerləşən bir sıra məktəblərdə tədris ilinin ortasında siniflərin ləğv olunmasına başlanılıb. Ümumi məlumata görə, bu, baş verəcək müəllim ixtisarları ilə bağlıdır. Direktorlar isə siniflərin kütləvi şəkildə bağlanmasını uşaq sayının azalması ilə əlaqələndirir. Bu zaman belə bir sual yaranır: "Əgər sinifdə şagird sayı az idisə, ilin əvvəlindən siniflər ləğv olunardı, niyə tədris ilinin başa çatması gözlənilmir?”.

Məsələ ilə bağlı Təhsil Nazirliyinin informasiya şöbəsi, QHT və KİV-lə iş sektorundan bildirilib ki, bu proses Nazirlər Kabinetinin qərarı ilə müəyyənləşir: "Ümumi təhsil müəssisələrində siniflərin təşkil olunması, birləşdirilməsi və ya paralel sinfin təşkil edilməsi Nazirlər Kabinetinin "Ümumi təhsil pilləsinin dövlət standartı və proqramları (kurikulumları)”nın təsdiq edilməsi haqqında” 3 iyun 2010-cu il tarixli 103 nömrəli qərarının 12-ci bəndinə əsasən aşağıdakı qaydada tənzimlənir:

Ümumi təhsil müəssisələrində siniflər şagirdlərin sayı 20 nəfər olmaqla müəyyən edilir, bir sinifdə şagirdlərin ümumi sayı 20 nəfərə çatmadıqda, mövcud şagird sayı ilə sinif təşkil olunmasına yol verilmir”.

Məlumatda bildirilib ki, eyni bir sinifdə şagirdlərin sayı 30 nəfərdən çox olduqda və ya şagirdlərin bir sinifdə tədrisinə sinif otağının ölçüsü imkan vermədikdə, həmin sinif üzrə ikinci paralel sinif təşkil edilir:

"Tədris ilinin birinci yarısında hər hansı bir səbəbdən siniflərdə şagirdlərin sayı azaldıqda və ya artdıqda, siniflər bu dövlət standartlarına müvafiq olaraq müəyyən edilmiş say həddində birləşdirilir və ya paralel sinif təşkil edilir”.  (modern.az)