"Hökumət yol vergisinin yığılma qaydasını dəyişdi: bu vergini avtomobillərin texniki baxışdan keçən zaman birdəfəlik ödəniş qaydasını ləğv etməklə, il boyu istifadə etdikləri benzinin qiymətinə 2 qəpik əlavə ilə yığmaq variantını tətbiq etmək istəyirdi.
Ancaq bu addım cəmiyyətə normal qaydada izah olunmadığı üçün narazılıq yaratdı. Cəmiyyətdə belə bir gözlənti var idi ki, əgər neftin qiyməti qalxanda benzinin də qiyməti qaldırıldısa, indi neftin qiyməti kəskin surətdə aşağı düşdüyü şəraitdə benzinin qiyməti də aşağı salınmalıdır”.
Bu sözləri Milli Məclisin İqtisad komitəsinin üzvü, deputat Əli Məsimli bildirdi. Deputat benzinin qiymətinin prezidentin tapşırığı ilə Tarif Şurasının ucuzlaşdırması haqda danışarkən qeyd etdi ki, əhali neftin ucuzlaşması fonunda yanacağın bahalaşdığını gördü:
"Benzinin qiyməti hər litr üçün 2 qəpik artırıldı. Bu, cüzi rəqəm olsa da, hansı məqsəd daşımasından asılı olmayaraq, bəzi hanaratlığa yol aça bilərdi.
Azərbaycan Respublikası Prezidentinin tapşırığına əsasən qərar ləğv edildi. Ölkə ərazisində istehsal edilərək daxili istehlaka yönəldilən avtomobil benzini, dizel yanacağı və maye qazın hər litri üzrə 2 qəpik yol vergisi şirkətdaxili tariflərin azaldılması hesabına tətbiq edilməklə, əvvəl olduğu kimi Aİ-92 markalı avtomobil benzininin pərakəndə satış qiyməti 1 litr üçün 70 qəpik, dizel yanacağının pərakəndə satış qiyməti isə 1 litr üçün 60 qəpik səviyyəsində müəyyən olundu.
Prezidentin təklif etdiyi variant daha ədalətli variantdır. Çünki qeyd etdiyimiz kimi, bu variantda həm büdcə uduzmur, həm də əhali uduşlu olur. Ona görə də yeni variantı daha məqbul və ədalətli hesab edirik”. (axar.az)
Xəbərdən istifadə edərkən istinad etmək vacibdir.
