Bu gün Bakı və Sumqayıt şəhərlərində fəaliyyət göstərən ümumi təhsil müəssisələrinin şagirdləri arasında təşkil olunan "Məktəblilərarası I fənn müsabiqəsi”nin qaliblərinin mükafatlandırılması mərasimi keçirilib.

Tədbirdə çıxış edən təhsil nazirinin müavini Ceyhun Bayramov bildirib ki, Azərbaycan prezidenti tərəfindən təsdiqlənmiş Təhsilin İnkişafı üzrə Dövlət Strategiyası istedadlı uşaqların müəyyən edilməsi, onların inkişafına yönəlmiş hədəfləri özündə əks etdirir. Nazir müavini qeyd edib ki, istedadlı uşaqların aşkara çıxarılmasında isə olimpiadalar və fənn müsabiqələri müstəsna əhəmiyyətə malikdir: "Bunu nəzərə alaraq, fənn olimpiadalarının final mərhələsi Təhsil Nazirliyinin xüsusi nəzarəti altında şəffaflıq və aşkarlıq prinsipləri əsasında keçirilib. Belə müsabiqələr istedadlı şagirdləri aşağı siniflərdə müəyyən etməyə kömək edir”.

Qeyd olunub ki, məktəblər müsabiqədə riyaziyyat fənni üzrə VI, VII və VIII, təbiət elmləri üzrə isə VII, VIII və IX siniflərin hər birindən 3 nəfər olmaqla 9 nəfərlik komandalarla təmsil olunub. Üç mərhələdə aparılan bu bilik yarışında 500-ə yaxın şagird iştirak edib.

Tədbirin sonunda fərdi qaydada riyaziyyat, kimya, fizika və biologiya fənləri üzrə I, II və III yer tutan şagirdlərə diplom və medallar təqdim olunub. Hər fənn üzrə ilk onluqda olan şagirdlər isə hədiyyələrlə mükafatlandırılıb. Komanda hesabında riyaziyyat və təbiət elmləri üzrə I, II və III yer tutan ümumi təhsil müəssisələrinə kubok verilib.

(apa.az)