Bu il iyunun 25-də Bakıda I Avropa Oyunları keçiriləcək. Bu səbəbdən paytaxtda fəaliyyət göstərən ali təhsil müəssisələrində qış imtahan sessiyası vaxtından tez başladı və imtahanlar arasındakı məsafə çox qısa oldu. Demək olar bəzi universitetlərdə tələbələr iki gündən bir imtahan verib. Artıq qış imtahan sessiyası başa çatmaq üzrədir.

Maraqlıdır, Avropa Oyunlarına görə qısa müddətdə keçirilən imtahanlarda tələbələrə hər hansı güzəştlər edilibmi?

Tələbələrin məsələ ilə bağlı fərqli cavablarını təqdim  edirik.

Bakı Slavyan Universitetinin Jurnalistika və Azərbaycan Filologiyası  fakültəsinin IV kurs tələbəsi Şəfiqə Dadaşovanın sözlərinə görə, imtahanlar çox rahat  keçib: "İmtahanların suallarının hamısı dərslərdə keçdiklərimiz idi. Müəllimlərimiz həmin dərsləri çox yaxşı tədris etmişdilər. İmtahanlar yaxşı keçdi, nəticələrimiz də qaneedicidir. Qrupumuzun əksər uşaqları zərbəçi oldular. İmtahandan kəsilənlər olmayıb. Demək olar ki, BSU-da imtahanlar problemsiz keçir. Müəllimlər də bəzən güzəşt edib, bizi incitmirlər”.

Qafqaz Universitetinin Turizm fakültəsinin tələbəsi adının qeyd olunmasını istəmir. Dediyinə görə, bir dəfə belə sorğuda iştirak edəndə problemlə üzləşib. Onun sözlərinə görə, imtahanlarının 4-ü çox çətin olub və onlara heç bir güzəşt edilməyib: "I kursda oxuyan 29 tələbədən  28-i informatika fənnindən kəsilib. İmtahanlar yazılı olur. Bu, bizim üçün çox çətindir. Amma indi əksər universitetlərdə imtahanlar  kompüterlə keçirilir. Bizdə də bu qaydanın tətbiqi yaxşı olardı”.

Tibb Universitetinin Müalicə-profilaktika fakültəsinin tələbəsi Məhbubə Xəlilova isə qeyd edir ki, Avropa Oyunlarına görə imtahanlar arasında interval qısa olduğundan iki gündən bir imtahan veriblər: "Buna baxmayaraq, imtahan testlərimiz sentyabr ayından saytımıza yükləndiyi üçün dərsləri keçdikcə imtahan testlərini də öyrənirdik. Bu günə qədər verdiyim imtahanların hamısından 40-dan yuxarı bal toplamışam. İmtahanlarda pul verməyimizə gəldikdə, rektorumuz çox sağ olsun, kompüterlərlə imtahan verdiyimiz üçün tam obyektiv keçir. Rüşvətdən söhbət gedə bilməz. Əvvəlki illərdə imtahanlara düşən testlərin 25 faizi gizlin saxlanılırdı. Bu il isə imtahan düşən testlərin hamısı sayta yüklənib”.

Azərbaycan Neft Akademiyasının İqtisadiyyat və beynəlxalq iqtisadi münasibətlər fakültəsinin tələbəsi Aynur Ağabalayevanın sözlərinə görə, 5 imtahan verib və Avropa Oyunlarına görə imtahanlar arasındakı fərq çox az olub: "Buna baxmayaraq, imtahanlar əvvəlki qaydada keçirildi. İmtahan suallarının sayı azaldılmışdı. Bunu da güzəşt hesab etmək olar, çünki əvvəllər bu qayda tətbiq edilmirdi”.

Xəzər Universitetinin İqtisadiyyat və menecment fakültəsinin tələbəsi Nailə Əliyeva bildirib ki, Avropa Oyunlarına görə imtahanlar arasında çox az fərq olub və onlar güzəştlərin olacağını gözləsələr də, bu arzuları ürəklərində qalıb: "İmtahanlar əvvəlkindən də ağır oldu. Bütün imtahanlar üst-üstə düşdü. Sanki vəziyyətdən istifadə etdilər. 6 imtahan verdim və nəticələrdən qətiyyən razı deyiləm. Vaxt azlığından və  imtahanların ard-arda olmasından yaxşı hazırlaşa bilmədik. Bizə heç bir güzəşt edilmədi”.

Bakı Dövlət Universitetinin Jurnalistika fakültəsinin tələbəsi Fidan Həsənzadə deyib ki, 6 imtahan verib və heç bir güzəşt olunmayıb.

Azərbaycan Dillər Universitetinin tələbəsi Səkinə Ağalarova bildirdiyinə görə, onun üçün güzəşt bir gündə 3 imtahan verməkdən xilas olmasıdır:
"Ötən il xaricdə təhsil aldım. Bir illik proqramla kredit fənlərim qalmışdı. Buna görə, bu il iki kursu bir yerdə oxudum. Toqquşan fənlərim vardı və digər boş günlərə salmağıma imkan yaradıldı.  Ümumiyyətlə, bu qış imtahanlarında fərqli bir güzəşt olunmadı”.

Azərbaycan Universitetinin tələbəsi Suliddin Bağırovun sözlərinə görə,  rektorun təklifi ilə imtahan sualları 500-dən 300-ə endirilib və bu onlar üçün çox yaxşı hal olub. O, imtahanların gedişindən və nəticəsindən razı qalıb.

Azərbaycan Dövlət İqtisad Universitetinin Biznes inzibatçılığı fakültəsinin tələbəsi Qumru Camalova deyir ki, bu il qış imtahan sessiyası əvvəlki illərə nisbətən daha obyektiv, normal keçdi.
" Rektorumuz Ədalət Muradov Avropa Oyunlarına görə, imtahanlar arasında olan vaxt azlığını nəzərə alaraq, bu istiqamətdə təkmilləşdirici addımlar atdı. İmtahan suallarının sayını azaltdı. Bundan əlavə, universitetimizdə tələbələr üçün imtahan qabağı öz biliklərini yoxlamaq üçün vebsayt açdırdı. Burada tələbələr istədiyi vaxt istədiyi yerdə sınaq imtahanı verə bilər. Bununla da tələbələr imtahanlara hazır olub-olmadıqlarını yoxlaya bilərlər”.
Q. Camalova imtahanlarının nəticəsinin yaxşı olduğunu və yüksək bal toplayaraq zərbəçi olduğunu da deyib.


(modern.az)