2014-cü ilin statistikası 2013-cü illə müqayisədə

Yol qəzalarının günün ən aktual problemləri sırasında ilk yerlərə çıxması təbii ki, narahatlıq yaradır.

Sumqayıtda da bu gün avtomobil sayı sürətlə artır, artıq paytaxta xas olan tıxaclara şəhərimizdə də rast gəlməyə başlayırıq. Amma yollarda bizi narahat edən daha bir problem var – yol qəzaları.

Bu dəfəki həmsöhbətimiz  Sumqayıt şəhər Dövlət Yol Polisi şöbəsinin Təbliğat üzrə inspektoru, polis baş – leytenantı Fəqan İsmayılovdur. Onunla elə yol qəzalarından, onların səbəblərindən danışmışıq, ötən ilin statistikasını nəzərdən keçirmişik.

- Fəqan müəllim, Sumqayıtda bu il baş verən yol nəqliyyat hadisələri zamanı nə qədər insan dünyasını itirib?

- 2014-cü il ərzində şəhərimizdə 127 yol nəqliyyat hadisəsi olub. Bu qəzalar nəticəsində 27 nəfər həlak olub, 152 nəfər isə yaralanıb.

Müqayisə üçün deyim ki, 2013-cü il ərzində  151 yol nəqliyyat hadisəsi baş vermişdi. Bu qəzalar nəticəsində 50 nəfər insan ölmüş, 155 nəfər isə yaralanmışdır.

- Bəs maraqlıdır – hansı küçələrdə daha çox qəzalar baş verir? Keçən il ərzində şəhərimizin hansı küçələrində daha çox yol qəza hadisələri baş vermişdir?

   2014-cü il ərzində ən çox yol qəzası Sülh küçəsində olub. 14 yol nəqliyyat hadisəsi zamanı 3 insan həyatını itirmiş, 12 nəfər isə yaralanmışdır.

   Heydər Əliyev küçəsində 6 yol nəqliyyat hadisəsi olmuş, həlak olan yoxdur, lakin 9 yaralı olub.

    Koroğlu küçəsində isə 12 nəqliyyat hadisəsi olmuş, 5 ölü, 15 yaralı...

    Səməd Vurğun küçəsində 11 yol nəqliyyat hadisəsi zamanı 3 ölü, 15 yaralı olmuşdur.

Şəhərimizin daxilində digər tez-tez yol qəzası baş verən küçə Sahil küçəsidir. İl ərzində bu küçədə 10 nəqliyyat hadisəsi baş vermiş və nəticədə 1 ölü, 10 yaralı olmuşdur.

Şəhərdən kənar isə ən çox yol qəzası Bakı-Quba yolunda baş verir. Ötən il ərzində bu yolda 16 yol nəqliyyat hadisəsi zamanı 6 ölü olmaqla, 35 yaralı olmuşdur. Təsəvvür edin ki, 2013-cü il ərzində Bakı-Quba yolunda 40 yol nəqliyyat hadisəsi olmuşdur. Bu qəzalar nəticəsində 26 insan dünyasını dəyişmiş, 43-ü isə yaralanmışdır. Bu yolda 2014-cü il ərzində yol qəzaları azalmışdır. Bunun da əsas səbəbi növbətçi patrulların hər gün Bakı-Quba yolunda sayrışan işıqlarla səhərə kimi xidmət aparmasıdır.

- Bilmək istərdik ki, şəhərimizdə yol qəzaları əsasən hansı səbəblərdən baş verir?

 -  Şəhər daxilində qəzaların əsas səbəbi sürücülərin və piyadaların işıqforun işıqlarına məhəl qoymayaraq hərəkətə davam etmələridir. Eyni zamanda  yol iştirakçılarının yol hərəkəti nişanlarına riayət etməmələri qəzalara yol aparır...

   Bakı-Quba yolunda isə ötmə, yüksək sürət yol qəza hadisələrinin artmasına səbəb olmuşdur.

Şəhərdaxili yollarda sürətlə bağlı hadisələr nadir hallarda olur. Bunun da əsas səbəbi şəhərimizdə uzun küçələrin olmamasıdır.

- Bəs, keçən il ərzində ictimai nəqliyyatda nə qədər yol qəza hadisəsi olub?

  - İctimai nəqliyyatda 2013-cü il ərzində 8 yol nəqliyyat hadisəsi olmuş və nəticədə 3 insan ölmüş, 5 insan isə yaralanmışdır.

   2014-cü il ərzində isə 3 yol nəqliyyat hadisəsi ( 2 ölü, 4 yaralı) olmuşdur.

- Fəqan bəy, bəzi küçə və prospektlərdə köhnə işıqforlar hələ də qalmaqdadır. Bilmək istərdik ki, köhnə işıqforlar yeni işıqforlarla əvəz olunma prosesi nə vaxt başa çatdırılacaq?

   - Artıq şəhərimizin 70-80 % küçələrində yeni işıqforlar quraşdırılıb. Fikrimcə, köhnə işıqforların yeni işıqforlarla əvəz olunma prosesi 2015-ci ilin sonuna kimi başa çatacaqdır.

Elmir Ağayev, 168saat.com