Sumqayıt Şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə mövcud Pandemiya qaydalarına uyğun olaraq şəhər gənclərinin Quba rayonunda "Yay məktəbi”nə start verilmişdir. Yay Məktəbinin təşkilində məqsəd "Azərbaycan gəncliyi 2017-2021-ci illərdə” Dövlət Proqramının müvafiq bəndlərinin icrası, Qarabağ Vətən Müharibəsi və əldə olunmuş böyük qələbənin təbliği, şəhid və qazi övladlarının yay düşərgələrində iştirakının təmin edilməsi, gənclərə milli-vətənpərvərlik hisslərinin aşılanması, ölkəmizin bölgələrini tanımaları və asudə vaxtlarının səmərəli təşkil edilməsidir.

Cari ilin 01 iyun tarixində Heydər Əliyev Mərkəzində "Yay məktəbi”nin ilk turunun açılış mərasimində Baş İdarənin rəisi Elgün Hümbətov çıxış edərək Ali Baş Komandan İlham Əliyevin rəhbərliyi ilə Vətən müharibəsinin şanlı qələbə ilə sona çatmasından, 44 gün davam edən hərbi əməliyyatlarda Azərbaycan Ordusunun işğalçı ermənistanın 30 il ərzində qurduğu silahlı qüvvələrini darmadağın edərək, böyük zəfərə imza atmasından, Ölkə Başçısının, şəhər rəhbərliyinin, Gənclər və İdman Nazirliyinin gənclərə göstərdiyi diqqət və qayğıdan danışmış, yay məktəbinin məqsəd və vəzifələri, təhlükəsizlik qaydaları barədə iştirakçılara məlumat vermişdir.

Qeyd edək ki, "Yay Məktəbi”nin ilk turlarında Vətən Müharibəsi qaziləri, şəhərin müxtəlif sahələrini təmsil edən ictimai fəal gənclər, müxtəlif yarış, müsabiqə, festival qalibləri, Baş İdarənin təşkil etdiyi könüllülük fəaliyyətinə cəlb olunan gənclər və idman ictimaiyyəti nümayəndələri iştirak etmişlər.

Azərbaycanın qədim bölgələrindən olan Quba rayonunda təşkil olunan "Yay Məktəbi”ndə iştirakçılar Quba rayonun əsrarəngiz təbiəti ilə tanış olmuş, habelə gənclər arasında intelektual, əyləncəli oyunlar keçirilmiş, yemək və çay fasilələri təşkil edilmişdir.

Xəbərdən istifadə edərkən istinad etmək vacibdir.