Azərbaycan Xalq Cəbhəsi Partiyasının (AXCP) Sumqayıt şəhər təşkilatının keçmiş üzvü Cabbar Savalanlı bu gün günorta saatlarında Sumqayıt şəhər Polis İdarəsinin əməkdaşları tərəfindən saxlanılıb. Bu barədə "Xeberle.com"-a AXCP Sumqayıt şəhər təşkilatının sədri İsa Qurbanov məlumat verib. Məlumatı dəqiqləşdirmək üçün Sumqayıt şəhər Polis İdarəsinin növbətçi hissəsi ilə əlaqə saxladıq. Oradan bizə bildirdilər ki, C.Savalanlının həbsi barədə məlumatları yoxdur.

Vəkil Əsabəli Mustafayev isə Xeberle.com-a bildirdi ki, C.Savalanlı həqiqətən də Sumqayıt polsi tərəfindən saxlanılıb və polisin göstərişinə əməl etmədiyinə görə Sumqayıt şəhər Məhkəməsinin qərarı ilə 20 sutka azadlıqdan məhrum edilib.

Xatırladaq ki, C.Savalanlı 2012-ci ilin mayında Sumqayıt şəhər Məhkəməsi Cabbar Savalanlını 2 il yarım müddətinə azadlıqdan məhrum etmişdi. O, qanunsuz narkotik maddə saxlamaqda ittiham olunmuşdu. Həmin ilin dekabrın 26-da isə prezident İlham Əliyevin bir sıra məhbusun əfv olunması haqqında imzaladığı sərəncamla azadlığa buraxılmışdı.