Azərbaycanda 5 milyon insana vaksin vurulsa da, iki doza peyvənd edilən şəxslərin sayı kifayət qədər deyil. Bu səbəbdən kütləvi vaksinasiyanın olması şərtdir. Yaxın 2 ay ərzində vaksin olunanların sayı artdıqca, onun verəcəyi effekti daha yaxşı müşahidə edəcəyik.
Xeberle.com xəbər verir ki, bunu Səhiyyə Nazirliyinin baş infeksionisti Təyyar Eyvazov deyib. O bildirib ki, Azərbaycanı əhatə edən ölkələrdə koronavirusla bağlı vəziyyət bizdən daha tez pisləşib:
"Ölkəmizdə vəziyyət hələ idarəolunandır. Lakin mənfi dinamikanın yaşanmasını istəmiriksə, ciddi olaraq qaydalara əməl etməliyik. Digər tərəfdən vaksinasiya prosesini bir qədər də sürətləndirməyə çalışmaq lazımdır. Müəyyən qədər əhali kütləsi vaksinasiyata cəlb olunandan sonra bunun effektivliyi müşahidə edəcəyik. Biz bu gün yoluxanlarla yanaşı, ölüm göstəricisini ötən ilin noyabr-dekabr ayları ilə müqayisə etsək, böyük fərqi görərik. Ötən il 1000-dən çox yoluxmada ölüm rəqəmləri daha yüksək idi. Xəstələrlə məşğul olan qurumların, həkimlərin yaydığı məlumatlarda qeyd olunur ki, yeni yoluxanların 90 faizi peyvənd olunmayanlardır”.
T.Eyvazov ölüm sayının az olmasını risk qrupunda olan əhalinin ilk növbədə peyvənd olunması ilə əlaqələndirib:
"Hazırda infeksiyaya yoluxma aşağı yaş qruplarını əhatə edir. Burada da vaksinasiyanın effektivliyini müşahidə edirik. Yaxın vaxtlarda daha böyük kütlə buna cəlb olunanda vəziyyət daha idarəolunan olacaq”.
Xəbərdən istifadə edərkən istinad etmək vacibdir.
