"Xeberle.com portalı son vaxtlar Sumqayıt şəhərində ətraf mühitin çirkləndirilməsi ilə bağlı materiallar verir. Gənc həmkarlarıma da bu məsələni qaldırdıqları üçün minnətdarlığımı bildirirəm. Əməkdar jurnalist Eyruz Məmmədov həmin materiallara münasibətini bildirdiyi yazıda yaranmış bu ekoloji durumu "genofondumuza vurulan zərbə" kimi qiymətləndirir. Mən də bu vicdanlı qələm sahibinin, doğma Sumqayıtımız üçün həmişə can yandıran Eyruz müəllimin yazıda qaldırdığı məsələrlə tam şərikəm.”

Bu sözləri sumqayıtlı jurnalist Müqəddəs Şahbazov söyləyib. M.Şahbazov Sumqayıtın girəcəyinə yaxın bir yerdə məişət tullantılarının yandırılmasının ürəkaçan fakt olmadığını vurğulayıb: "Poliqonun olması yumşaq şəkildə desəm, heç də ürəkaçan fakt deyil. Eyruz müəllimin də ürəkağrısı ilə yazdığı kimi, bir zamanlar şəhərdəki kimya zavodlarının buraxdığı "qazovka"dan əziyyət çəkən əhali, indi də müxtəlif məişət tullantılarının yandırılmasından yaranan üfunətli, boğucu hava ilə nəfəs almalı olur. Ən pisi də odur ki, bu poliqona təkcə Sumqayıt şəhərinin məişət tullantıları daşınmır, illər öncəsi televiziyada işləyərkən komitələrdən birinin respublikanın bütün ərazisində müsadirə etdiyi malları burada yandırdığının şahidi olmuşam. Komitənin əməkdaşlarından biri özü də etiraf etdi ki, müsadirə olunmuş malların belə məhv edilməsini televiziyada göstərmək əslində yaxşı hal deyil. Çünki dünyanın qabaqcıl ölkələrində belə bir təcrübə yoxdur və buna çox pis baxırlar. Çox inanmaq istərdim ki, məsələ tez bir zamanda öz həllini tapacaq. Hər bir Sumqayıt sakini bu problemin aradan qaldırılması üçün ən azından səy göstərməlidir.”

Xeberle.com