Təxminən 2-3 saat öncə Sumqayıtın 2-ci girişi sayılan Daş Bazarı ərazisini su basıb. Xeberle.com-un hadisə yerində olan əməkdaşının verdiyi məlumata görə, Saray körpüsünün işıqforundan ta Daş Bazarınadək avtomobil yolu su altında qalıb. Avtomobillərin hərəkətində ləngimələr yaranır, ərazidə tıxac yaranması ehtimalı var. Su ətraf ərazilərə, körpünün və yolun aşağı hissəsində tikilən evlərin həyətlərinə axmaqdadır. Maraqlıdır ki, problemlə bağlı ərazidə heç bir əlaqədar qurum təcili təxirəsalınmaz işlər aparmırdı. Üstəlik Su idarəsinin qaynar xəttinə zəng edib problemi bildirəndə, ilk şəxs olduğumuzdan təəccübləndik.
Xatırladaq ki, bu yol bir neçə ay öncə çox gözəl şəkildə yenidən salınmışdı. Ehtimal ki, bu miqdarda su istər istəməz yolda öz fəsadlarını göstərəcək. İlkin ehtimal ki, problemə səbəb ana xətt su borusunun deşilməsidir.