Dərbəndin Torpaq və Xəritəçəkmə Komitəsinin rəhbəri, milliyyətcə azərbaycanlı olan Kamil Seyidovla bağlı araşdırma aparılır.

Bu barədə Axar.az-a Dərbənddəki etibarlı mənbədən məlumat verilib. 

Mənbə azərbaycanlı məmurun işinin Abdulatipovun nəzarətində olduğunu bildirib. Seyidovla bərabər, onun müavini Qüdrət Aybatovun da işi araşdırılır. Həmçinin Dərbəndin rəhbəri İmam Yaraliyevin öz qayını Aybatovun Abdulatipovun nəzarəti altındakı araşdırmadan çıxarılması üçün çalışdığı iddia edilir.

Araşdırmanın bütövlükdə ləğv edilməsinə çalışan Yaraliyev bunun üçün hətta Rusiyanın Şimali Qafqazdakı nümayəndəsi Sergey Məlikova da müraciət edib. Yaraliyevə bu işdə onun əsas himayədarı, ləzgi milyarder Süleyman Kərimov yardım edir. Oliqarx Abdulatipova təzyiqləri artırmaqdan ötrü Kremldəki kanallarını işə salıb.

Mənbəmiz Abdulatipovun bütün təzyiqlərə baxmayaraq, səylə istintaqı davam etdirdiyini və Yaraliyevi əvəz etməyə çalışdığını bildirib.

Hazırda Dərbənd şəhər bələdiyyəsi rəhbərliyinə ən real namizəd bir müddət öncə Dərbənd şəhər Administrasiyasının rəhbəri təyin edilmiş milliyyətcə azərbaycanlı olan Mövsüm Rəhimov sayılır. Məhz onun Yaraliyevin yerinə vəzifəyə gətiriləcəyi gözlənilir. Bu vaxta qədər isə bu ad gizli saxlanılırdı.

Qeyd edək ki, bir müddət öncə Dərbənd Administrasiyası OMON tərəfindən mühasirəyə alınaraq, torpaqların paylanılması ilə bağlı sənədlər yoxlanılmışdı.   (axar.az)