Sumqayıt Şəhər İcra Hakimiyyəti Başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın təşəbbüsü, Sumqayıt şəhər Polis İdarəsi, şəhər Gənclər və İdman Baş İdarəsi və Narkoloji Dispanserin birgə təşkilatçılığı ilə "Sumqayıt Narkomaniyaya Yox Deyir” devizi altında ümumtəhsil müəssisələrində maarifləndirici xarakterli görüşlərə start verilmişdir. Məqsəd məktəbliləri sağlam həyat tərzinə təşviq etmək, narkomaniya, tütün, alkoqol və digər psixatrop maddələrin mənfi təsiri ilə bağlı bilikləndirmək və bu sahədə davranışlarını təkmilləşdirməkdir.
22 oktyabr 2021-ci il tarixində 9 saylı tam orta məktəbin akt zalında mövcud pandemiya qaydalarına uyğun keçirilən görüşdə çıxış edənlər şəhər Polis İdarəsinin Narkotiklərlə Mübarizə Bölməsinin əməkdaşı İlham Rəhimov, Yetkinlik yaşına çatmayanlarla profilaktik işin təşkili bölməsinin əməkdaşı Azər Bağırov, Gənclər və İdman Baş İdarəsinin əməkdaşı Ceyhun Hüseynov və Narkoloji Dispanserin həkimi Vüsal Cabbarov Respublikamızda narkomaniya və narkobizneslə mübarizənin ən üst səviyyədə aparıldığını, şəhər Polis İdarəsinin aidiyyatı bölmələri ilə yanaşı ictimai təşkilatların da fəallığının artırıldığını qeyd etdilər. Bildirildi ki, şəhərdə narkomaniya əlehinə mütəmadi olaraq tədbirlər keçirilir, yeniyetmə və gənclərə narkomanların taleyi, narkomaniyanın fəsadları, sosial təsirləri və ondan qorunmağın yolları barədə məlumatlar verilir.
Tədbirdə iştirakçılara narkomaniyanın fəsadlarını əks etdirən "Ampula” adlı videoçarx nümayiş olunmuş, maarifləndirici xarakterli bukletlər paylanılmışdır.
Sonda mövzu ətrafında gənclərlə fikir mübadiləsi aparılmış, onları maraqlandıran suallar cavablandırılmışdır.
Xəbərdən istifadə edərkən istinad etmək vacibdir.
