Sumqayıt Regional Mədəniyyət İdarəsinin təşkilatçılığı ilə Sumqayıtın Tarixi Muzeyində kulturoloji ustad dərsi keçirilib. İnsan kapitalının tərəqqisinə yüksək mədəniyyətli şəxsiyyət və liderlərinin formalaşdırılmasında xidmət edən əlavə kulturoloji ustad dərsi "Simurq” Azərbaycan Mədəniyyət Assosiasiyasının prezidenti professor Fuad Məmmədov tərəfindən keçirilib.
Xeberle.com-a verilən məlumata görə, tədbirdə Sumqayıt Şəhər Regional Mədəniyyət İdarəsinin rəisi Rəşad Əliyev, idarənin tabeliyində olan mədəniyyət müəssisələrinin gənc rəhbər və müəllim heyəti iştirak edirdi.
Tədbiri giriş sözü ilə açan Sumqayıt Regional Mədəniyyət İdarəsinin rəisi Rəşad Əliyev vurğulayıb ki, mədəniyyət müəssisələrində çalışan əməkdaşların hərtərəfli inkişafı, yüksək mədəniyyətli şəxsiyyət kimi formalaşdırılmasına xidmət edəcək kulturoloji ustad dərslərinin keçirilməsi vacibdir.
Tədbirdə çıxış edən kulturoloq, Tarix Elmləri doktoru, Azərbaycan Respublikasının Prezidenti yanında Dövlət İdarəçilik Akademiyasının professoru, "Simurq” Azərbaycan Mədəniyyət Assosiasiyasının prezidenti Fuad Məmmədov qeyd edib ki, kulturologiya, intellektual və əqli mədəniyyət, mənəvi mədəniyyət mədəni inkişafın əsas amilləridir və bu xüsusda kulturoloji ustad dərslərinin keçirilməsi zəruridir. Mövzu ilə əlaqədar hazırlanmış "Kamilliyə aparan yol” adlı videoçarx tədbir iştirakçılarına təqdim olunub.
Tədbir çərçivəsində "Simurq” Azərbaycan Mədəniyyət Assosiasiyasının prezidenti Fuad Məmmədov Sumqayıt Regional Mədəniyyət İdarəsinə verdiyi töhfələrə görə və anadan olmasının 75 illik yubileyi münasibətilə Sumqayıt Regional Mədəniyyət İdarəsi tərəfindən Fəxri fərmanla təltif olunub.
Xəbərdən istifadə edərkən istinad etmək vacibdir.
