Dövrümüzdə xəstəliklər baş alıb gedir və onlar müxtəlif tiplərə bölünür: ruhi xəstəliklər, ürək-damar xəstləlikləri, yoluxucu xəstəliklər və s. Elə bu xəstəliklərə mübtəla olmuş xəstələr də tiplərə görə müxtəlifdir. Zaman-zaman təbiblər insanları xəstəliklərdən xilas etmək, onları sağlam həyata qaytarmaq üçün neçə-neçə çarələr, yollar axtarmışlar. Bəzən bu axtarışlar uğurlu, bəzən isə nəticəsiz olmuşdur.
Mən başqa bir neçə xəstəlikdən bəhs etmək istəyirəm. Məsələn nadanlıq xəstəliyi. Təəssüflər ki, günümüzdə yazdığım xəstəliyə tutulmuş xəstələr yetərincədir. Televizorda görür, radioda eşidirsiniz. Bəs nədir nadanlıq, necə bir xəstəlikdir? Nadanlıq sözünün hərfi mənası cahillik, gerilik, biliksizlik, cəhalət deməkdir. Indi gəlin görək, kimlərə bu diaqnozu qoymaq olar, kimlərdə bu xəstəliyin simptomları özünü büruzə verir?
Çox uzağa getməyək, biri elə şou-biznes (bu söz dilimizə daxil ən zibil sözdür) xəstə-nadanlarla doludur. Onlar arasında xalq artisti də var, əməkdarı da var, sıravi manısı da. Hələ onlara çəpik çalan gənclərimiz də az deyil. Xocalı faciəsi günü mahnı oxuyub şənlənən Nadir Qafarzadə kimi xəstə hələ bir əməkdar artist də olmaq istəyir. Hələ bir utanmazcasına "yadımdan çıxıb” deyirdi deyəsən. Nədənsə unudulur bu məsələ, ya da unuduldu artıq. Unutqanlıq canımıza hoparaq xəstəliyə çevrilir deyəsən.
Cəmiyyətdə nə qədər istəsən xəstələr var, mənəviyyatca şikəstlər. Tamaşaçının gözü önündə manatı cıran Sevinc və Sevil bacılardan yazım bir-iki kəlmə. Maraqlı bilirsinizmi nədir? "O ses Türkiye” musiqi yarışmasında seçim turundan keçən və jürilərdən biri Murat Boza sulanan bu bacıları mediamız bəh-bəhlə təriflər edərək göylərə qaldırdı. Sonra da digər media mənsubu bir veriliş də açaraq verdi bu bacılara ki, yırğalanın nə qədər istəyirsiniz? Məgər o zaman Murat Bozun qarşısında əzilib-büzülən bu bacıların intellekt səviyyəsi məlum olmadımı ki, 9 milyonun qarşısına çıxmaq üçün televəsiqə verdiniz? İndi də 1 manat üstündə aləmi qatmısınız bir-birinə. Hələ Balakənin Naxçıvanda yerləşdiyini söyləməklərini demirəm. İndi kimə xəstə deyəsən, dəliyə, yoxsa dəliyə yer, əlinə bel verənlərə?
Biri xalası qızına təcavüz edib, sonra da bıçaqlayıb qaçır. Başqa biri gəlnini öldürür, sonra da özünə qəsd edir. Digər biri isə əyninə şalvar almaq iqtidarında olmadığı halda azyaşlı qızı qaçırır. Nəyi sayasan, daha doğrusu, nə qədər sayasan? Hərə bir cür xəstədir. Hardan qaynaqlanır bu xəstəlik, mənbəyi haradır? Bəlkə şagirdinə ən əxlaqsız və tərbiyəsiz cavab verən məktəb direktoru kimi digər direktorların, vəhşi kimi uşaq döyən müəllimlərin məhsulu olan təhsilimizdir epidemiyanın mənbəyi? Bəs nüfuzu günü-gündən aşağı salınan müəllimləri şagird qarşısında aqressivləşdirən səbəblər hansılardır? Suallar çoxaldı həmişəki kimi və yenə də cavabsız qalır. Əslində səbəbləri də, cavabları da çox gözəl bilirik. Lakin nədənsə, dilimizə gətirmirik, ya da dilimizin ucundan geri qaytarırıq. Nəhayətdə xəstəliklər tüğyan edir. Sağlam vətəndaş yetirmək əvəzinə xəstə manıs, aparıcı və daha kimlər yetişir. Bəlkə də fərqinə varmırıq, lakin bir müddət sonra elmimiz də süqut edəcək. Ali məktəbdə oxuyarkən "Mənbəşünaslıq” adlı fənn keçirdik. Fənni tədris edən müəllimimiz bir dəfə ürək ağrısı ilə söylədi ki, bu elm can verir, əgər gənc mənbəşünaslar yetişdirlməzsə, dəfnə hazır olmalıyıq.
Biz cəmiyyətimizdə mövcud olan xəstəlikıərin də mənbəyini tapmalı, müalicə etməli və xəstəlii aradan qaldırmalıyıq. Vəhşi təbiətdən ibrətamiz bir misal gətirmək istəyirəm. Məlumunuzdur ki, ilan fəsil dəyişməsi ilə əlaqədar olaraq dərisini qabıq-qabıq atır və yerinə yeni dəri gəlir. Köhnəlmiş və xəstə dəri daha sağlam və gözəl dəri ilə əvəz olunur. Bundan zənnimcə, ibrət götürmək lazımdır, cəmiyyətin xəstələrini özümüz təmizləməli və sağlam cəmiyyətə keçməliyik.

Elvin Babayev
Xeberle.com