Milli Məclisin müvafiq komitələri təhsil naziri Mikayıl Cabbarov, müdafiə naziri Zakir Həsənov, əmək və əhalinin sosial müdafiəsi naziri Səlim Müslümovun rəhbər vəzifəyə təyinatından bəri gördükləri işə qiymət veriblər.

Elm və təhsil komitəsinin üzvü Əhməd Vəliyev: "Mən cənab nazirin bu posta təyin olunmasından indiyəqədərki müddətdə fəaliyyətini çox yüksək qiymətləndirirəm. Çünki qısa müddətədə Mikayıl müəllim yeni bir təhslin inkişaf modelini ortaya qoydu. Bununla bağlı ölkə başçısı da sərəncam verib. Təhslin İnkişafı üzrə Dövlət Strategiyasını müəyyənləşdirib və fəaliyyət planını da təsdiq edib. Hazırkı mərhələyə qədər çox böyük işlər aparılıb, əminəm ki bundan sonra da uğurlu addımlara imza atılacaq.
Ümumiyyətlə, qısa müddətdə aparılan islahatlar çox yüksək nəticələrə gətirib. Bildiyiniz kimi, təhsilin strategiası qısa müddətdə nəticə verə bilməz.
Cənab prezident tərəfindən 10 illik strategiya müəyyənləşdirilib. Bunun həyata keçirilməsində əsas aparıcı qüvvə də Təhsil Nazirliyidir. Nazirlik zamanla həmin strategiyanın həyata keçirilməsində işlərini davam etdirir. İnanıram ki, yaxın gələcəkdə daha böyük uğurlara imza atılacaq”. 

Təhlükəsizlik və müdafiə komitəsinin üzvü Siyavuş Novruzov: "Cənab Zakir Həsənov nazir təyin olunduqdan sonra çox böyük dəyişikliklər baş verib. Orduda nizm-intizamın artması, islahatların həyata keçirilməsi, maddi-texniki bazanın möhkəmləndirilməsi, cəbhə bölgələrində işin daha fəal şəkildə həyata keçirilməsi, düşmənə tutarlı cavabın verilməsi və s. kimi məsələlər hər kəsin gözü qarşısındadır”.

Sosial siyasət komitəsinin sədri Hadi Rəcəbli:

"Hörmətli Səlim Müslümovun təyinatından sonra müsbətə doğru dəyişən bir neçə məqamı nəzərinizə çatdıra bilərəm. İlk olaraq deyim ki, Səlim Müslümovun təyinatından sonra bu quruma müasirlik, təşəbbüskarlıq gəlib. Beynəlxalq təşkilatlarla geniş əməkdaşlıq əlaqələri yaradılıb, məmurdan asılılıq səviyyəsinin aşağı salınması və bunun hesabına bəzi neqativ hallara qarşı mübarizə metodlarının tətbiqi reallaşdırılıb. Sosial müdafiə güclənib, Qarabağ əlillərinə verilən evlərin, avtomobillərin sayı artıb.
Eyni zamanda onu da qeyd edim ki, cənab nazir cəmiyyətə, mətbuata açıqdır. Mütəmadi olaraq baş verən dəyişikliklərlə bağlı ictimaiyyəti məlumatlandırır. Bu da müsbət hal kimi aşkarlığa gətirib çıxarır”. 

Qeyd edək ki, Mikayıl Cabbarov nazir postuna 2013-cü il 19 aprel tarixində, Zakir Həsənovla Səlim Müslümov isə eyni gündə, 2013-cü il 22 oktyabr tarixində gətiriliblər.  (modern.az)