BAYRAQDAR MEDİA Dövlət Arxivi Şirvan filialının direktoru Nəsibə Nəsibqızının Xocalı soyqırımının 33-cü ili ilə bağlı yazısını təqdim edir:
Baş-baş, ayaq-ayaq, barmaq-barmaq…
Onlar şəhadətə tikə-tikə ucaldılar. Yandırıldılar. Tüstü olub buludlara sovruldular. O gecə bir şəhər talan olundu (25-26 fevral 1992-ci il). Ah edəni, geridə qalanı olmadı çoxlarının. Beli qurudu Xocalının… (Xatırladıqca adamın qanı quruyur.)
Buludların üstündə ovuc-ovuc ədalət dilənən ruhlar qaldı.
O soyuq qış gecəsinin bihal qar dənələri körpə qızcığazın kəsilib atılmış çarəsiz başına bədənlik etməmişdi bu vaxtacan. Bir az aralıda, o hündür ağacın dibində uyuyan qadının döşündən axan qanı durdurub, sinəsində döş olmamışdı…
Dırnaq-dırnaq sökülmüş uşaqların barmaqlarını sarıb-sarmalayan qar dənələri əsrlərdir dünyadakı hər cür çirkinliyin üstünü örtsə də ilk dəfə öz bəyazlığından, gizlədə bilmədiyi qan ləkəsindən utanmışdı.
Xocalı soyqırımının 33-cü ildönümüdür. Buracan olan dönümlərdə hər bir vətəndaş unutdurmamaq, qisas almaq üçün əlindən gələni etdi və soyqırım qurbanlarının ruhunun şad olması üçün qəhrəman oğullarımız əziz canlarını qurban verdilər. Minnətdarıq, dərin ehtiramla anırıq!
Artıq təqvimimizdə 8 noyabr 2020-ci il – Zəfər Günü var. Qisasımızı aldıq! İndi bircə istəyimiz var. Xocalıya ədalət!
2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə "Xocalıya ədalət” beynəlxalq maarifləndirmə kampaniyası başladıldı. Bu gün hər bir azərbaycanlı bu kampaniyanı davam etdirməli, unutdurmamalıdır. Ədalət mütləq zamanı gəlincə yumruğunu sıxıb haqsız, murdar cəlladların başını əzir.
"Xocalı mənim işimdir. Saysız-hesabsız Azərbaycan türklərini qırdım” deyən erməni generalı Levon Manisyan və bu etirafdan qorxuya düşən onun kimilər, unutmayın, haqq nazilsə də üzülməz.
Ədalətsiz güclərin meydanda at oynatdığı dövrü geridə qoymuşuq. İndi ədalətlilərin güclü olduğu dönəmdəyik. Antiterror əməliyyatlarından sonra (sentyabr, 2023) Xocalı yenidən doğuldu. Bu gün biz Xocalı sakinlərinin Xocalıya dönüşünü gördük. Vəhşicəsinə öldürülən, ana qarnında işgəncə görən körpələrin ah-naləsini 33 il sonra Xocalıda məhz fevral ayında (04 fevral 2025) dünyaya göz açan ilk körpənin (Məmmədov Mehdi İlqar oğlu) "inqə”si sakitləşdirdi. Mehdi adının mənası "düzgün yolda olan” deməkdir. Mehdi balamız da xalq olaraq düzgün yolda olduğumuzun carçısıdır. Ballıcada doğulan Mehdi Xocalıda yaşamın yenidən başlanğıcının təntənəsidir! 33 il əvvəl cansız körpəsini qucaqlayıb nalə çəkən çarəsizlərin yarasına bu gün Xocalıda doğulan körpəsini qucaqlayanlar su səpir. İndi Xocalıda doğan günəş evlərin camında gülümsəyir. Deməli Xocalı Allahın yadından çıxmayıbmış. Bu gün Xocalıda doğan o günəşin hənirtisi bütün dünyaya ədalət carı çəkir.
Çox şey istəmirik, biz Xocalıya ədalət istəyirik. İstəklərimiz, təmənnalarımız haqqa söykənir. 30 illik ağır işğala haqqa inandığımız üçün son verə bildik. Haqq bizimdir, bizimlədir!
Xocalı soyqırımı zamanı şəhid olan hərbçilərimizi, mülki şəhidlərimizi, soyqırımın bütün qurbanlarını bir daha ehtiramla anırıq!
Unutmadıq! Unutdurmarıq!
#KhojalyGenocide #XocalıyaƏdalət

Xəbərdən istifadə edərkən istinad etmək vacibdir.