Azərbaycanda qoca valideynlərini ataraq tərk etmiş övladların cəzalandırılması ilə bağlı qanun qəbul edilə bilər.
Bu barədə təkliflə vitse-spiker Bahar Muradova çıxış edib. Onun sözlərinə görə, bununla bağlı müvafiq qanun olmalıdır:
 
“Necə olur ki, gənc ailədə övladını atan atanın üzərinə aliment hüququ qoyuruq amma valideynini atan imkanlı şəxslər öz öhdəliklərini yerinə yetirmir? Biz bu öhdəlikləri müəyyənləşdirməli və onları buna məcbur etməliyik”-deyə Milli Məclisin sədr müavini bildirib.
 
Lakin maraqlı budur ki, Belə bir qanunun və ya cəza metodunun tətbiqi nə kimi effektiv ola bilər? Mövzu ilə bağlı FaktXeber.com-a açıqlama verən sosioloq Cavid İmamoğlu maraqlı fikirlər səsləndirdi.
 
Sosioloqun sözlərinə görə, hər bir məsələdən öncə bunu qeyd etmək lazımdır ki, Azərbaycan Respublikasının Ailə Məcəlləsi ilə əmək qabiliyyəti olmayan valideynləri saxlamaq əmək qabiliyyətli övladların üzərinə öhdəlik kimi qoyulub:
 
“Qanunun 82-ci maddəsi yetkinlik yaşına çatmış övladların valideynlərini saxlamaq vəzifəsi barədədir və bu məcəllə ilə övladlar həmçinin valideynlərinə aliment ödəməlidirlər və bu məhkəmə qaydası ilə tənzimlənir. Bahar xanım çox güman ki bu məcəllədən çıxış edərək valideynlərini tərk edən övladların cəzalandırılmasını təklif edib. Ancaq gəlin baxaq görək ki, bu təkliflə çıxış etmək üçün nə qədər ciddi əsaslar var.”
 
Yaşlılarla sosial iş sahəsinin ölkədə araşdırılmayan sahələrdən biri olduğunu və bununla bağlı hər hansı bir real tədqiqat həyata keçirilmədiyini bildirən ekspert, ”görəsən yaşlı insanlar özünü stasionar mərkəzlərdə yaxşı hiss edir, ya övladının yanında? Mən deputatlarımıza sual vermək istəyirəm ki, zorla insanları bir birinə mehriban etmək olarmı? Axı Azərbaycan Respublikasında Sosial Xidmət Haqqında Qanunda da var ki, bu qanun əsas məqsədi çətin həyat şəraitində yaşayan insanlara sosial iş və sosial xidmətin göstərilməsidir. Əgər bir övlad hər hansısa bir səbəbə görə öz valideyninə baxmaqdan imtina edirsə, biz cəzaları sərtləşdirmək əvəzinə cəmiyyətdəki maarifləndirmə və tərbiyə işini genişləndirməliyik”, - deyə qeyd etdi:
 
“Məgər valideynlər öz övladlarını müəssisəyə yerləşdirmirlərmi? Məgər ana öz övladını körpələr evinə öz istəyi və arzusu ilə verir? Xeyir, cəmiyyətdə mövcud sosial-iqtisadi durum və ailədaxili məsələlər səbəb olur ki, övlad valideynləri tərəfindən müəssisəyə yerləşdirilir. İndiki halda biz araşdırmalıyıq ki, Azərbaycanda il ərzində nə qədər yaşlı və ahıl valideyn övladları tərəfindən tərk edilir. Bunun əsas risk faktorları hansılardır. Yəni nə baş verir ki, övlad valideyninə baxmaqdan imtina edir? İlk növbədə bunların tədqiqatı aparılmalı və preventiv proqramlar qəbul edilməlidir. O ailələrdə ki, əmək qabiliyyətli valideynlərin tək qalmaq riski var, onlara dəstək verəcək təşkilatlar və dövlət xidmətləri fəaliyyət göstərməlidir. Yalnız bu halda biz hər hansısa bir sərt cəzalardan və ya cərimələrdən danışa bilərik. İndiki halda isə mövzu araşdırılmamış və tədqiq olunmamış vəziyyətdə açıq olaraq qalacaq.”