Milli Məclisin Səhiyyə Komitəsinin iclasında Azərbaycan Prezidentinin imzası ilə bir zərfdə Milli Məclisə daxil olmuş beş qanun layihəsi birinci oxunuşda komitənin müzakirəsinə çıxarılıb.
Xeberle.com xəbər verir ki, bu barədə Milli Məclisin deputatı Müşfiq Məmmədli məlumat verib. Deputat qeyd edib ki, bunlar "Narkoloji xidmət və nəzarət haqqında” qanunda dəyişiklik edilməsi barədə və "Hərbi qulluqçuların statusu haqqında”, "Narkotik vasitələrin, psixotrop maddələrin və onların prekursorlarının dövriyyəsi haqqında”, "Hərbi vəzifə və hərbi xidmət haqqında” qanunlarda və Azərbaycan Respublikasının 1994-cü il 23 sentyabr tarixli 887 nömrəli Qanunu ilə təsdiq edilmiş "Azərbaycan Respublikası Silahlı Qüvvələrinin Daxili xidmət nizamnaməsi”ndə dəyişiklik edilməsi barədə” iki qanun layihəsi, həmçinin Cinayət, İnzibati Xətalar və Cinayət Prosessual məcəllələrində dəyişikliklərin edilməsi ilə bağlı daha üç qanun layihəsidir: "Sözügedən qanun layihələri haqda müzakirələrdə iştirak etdik. Hərbi xidmətə çağırışçılar, müddətli hərbi qulluqçular, bağlaşma əsasında həqiqi hərbi xidmətə könüllü daxil olanların qulluq müddətində, narkotik maddələrin qəbul edib etməməsi ilə bağlı icbari narkoloji müayinədən keçməsi məsələlərinin hüquqi əsaslarının müəyyən olunması diqqətə çatdırılıb. Tərəfimdən təklif olundu ki, ilkin hərbi qeydiyyata alınmış 15-18 yaşlı gənclər də narkotik müayinədən keçsin və bu qanunvericiliyə salınsın. Dövrümüzün reallığını nəzərə alsaq sosial şəbəkələr gənclərə təsiri yüksəkdir. Bu vasitə ilə narkotikin təbliği birbaşa olaraq gənclərə təsir edir. Narkotik pereparatlardan və psixotrop maddələrdən istifadə edən gənclərin sayında artım müşahidə olunur. Bütün bunlar həm preventiv tədbir kimi həm də təbliğati vasitə kimi mühümdür. Həmçinin yeniyetmələrin bu problemlə hansı zamandan üzləşdiyini müəyyən etmək daha asan olardı".
Xəbərdən istifadə edərkən istinad etmək vacibdir.
