Novruz bayramı yaxınlaşır. Bahar bayramında həyat canlanır və təbiət oyanır. Bununla bərabər, Günəş təqviminə görə, bu tarixdə yeni il təhvil olur. Əslində hamımız bu ilin At üstündə təhvil olduğunu bilirik. Lakin tanınmış astroloq Səbuhi Rəhimli ANS PRESS-ə verdiyi müsahibədə bu ilin Xoruz üstündə təhvil olduğunu bildirib. Səbuhi Rəhimlinin müsahibəsinin təqdim edirik.

- Şərq təqviminə əsasən 2014-cü il at ilidir. Bəs Günəş təqvimində yeni il hansı heyvanın üstündə təhvil olacaq?

- At ili Çin təqviminə görə təyin olunur və 20 yanvar-18 fevral aralığında dəyişir. Məsələn, builki At ili yanvarın 31-də start götürüb. Novruzla bağlı il isə zərdüştilik astrologiyasına söykənir. Bu il də (21 mart 2014-cü il - 20 mart 2015-ci il) Günəş təqviminin 13-cü ili – Xoruz ilidir. Xoruz qədim Midiyada Xeyirxahlıq quşu, şan-şöhrət, üstünlük, cəsarət, ayıq-sayıqlıq, inkişaf rəmzidir.

Digər heyvanlarda olduğu kimi Xoruz da Xeyirlə Şərin əbədi mübarizəsində divlərə qarşıdır. Hər səhər banlamaqla onu yerdən qovur (İslami mənbələrdə də eynilə bu fikir öz əksini tapır). Avesta astrologiyasında Xoruz şan-şöhrət, şərəf rəmzi kimi qələmə verilir. Bu işarə altında doğulanlar Şərq astrologiyasında göstərildiyi kimi, hərbçidir, reformaçıdır, necə deyərlər kol-kosa ilişməyəndir. Onlar üçün başlanmış bir işi axıra çatdırmaqda həmişə çətinlik olur. Lakin ali “Xoruz” lar mirvari buğda topasına həmişə rast gəlirlər. Xoruz ilində doğulanlar cəngavərdir, aktiv və təhlükəsizdirlər. Onlar özlərini evsiz və övladsız təsəvvür edə bilmirlər. Bu adamlarda həmişə qaynar enerji, çoxlu planlar olur, səliqəli geyinirlər. Hər hansı hadisəni nağıl etməyi, bəzəməyi yaxşı bacarır.

Bu işarə altında doğulan adamların üz cizgiləri (mimikası) dəyişkəndir, canlı sifət quruluşları var. Açıq danışan və “özündən sonra körpüləri yandıran”dır. Xoruz ili məhkəmələrlə zəngin ildir. Bu ildə hər şey aşkara çıxacaq. Bir sözlə, Yeri qara qüvvələrdən, şər daşıyıcılarından təmizləyir. Avestada Xoruz ilinin antitotemi (iç üzü mənasında) bildirçindir. O, insanın solğun xarici görkəmini, gizlənmiş və mənfi üz cizgilərini himayə edir. Belə adamlar yaramaz, köməksiz və ağlagəlməz dərəcədə qəddar olurlar.

- Bakı vaxtı ilə yeni il nə zaman təhvil olur?

- Yeni il martın 20-də Bakı vaxtilə saat 20:59-da başlayacaq. Yəni Günəş Qoç bürcünə həmin dəqiqədə daxil olacaq və bununla da yeni il başlayacaq.

- Xoruz ilində nələr olacaq?

- Xoruz illərində baş verən hadisələrə nəzər yetirəndə görürük ki, bu dövrlərdə ən ziddiyyətli hadisələr bir-birini əvəz edib. Amma bütün hallarda Şər Xeyirin qarşısında xeyli zəifləyir, əksər cinayətlər cəzasız qalmır. Bu il həm də qəfil ölümlər gətirəcək. Lakin bunun yaxşı və ya yaman adamlara şamil olunacağını söyləmək çətindir.

Azərbaycana gəlincə, heç də sakit ilin şahidi olmayacağıq. Gözlənildiyi kimi olmasa da, qismən bahalaşma olacaq.

Bu il Veneranın təsir imkanları artması səbəbindən evliliyin sayı daha çox olacaq. Sevgi üzərində qurulmayan izdivacların pozulması halları isə artacaq.

- Yeni il ərəfəsində proqnozlarınızda bildirmişdiniz ki, Azərbaycanda 5-ə yaxın nazir, yaxud yüksək çinli məmurun istefa verəcək. Bəzi millət vəkillərindən sensasiyalı gedişlər olacaq. Daha sonra nə ola bilər?

- Bu sualın cavabını tam deyə bilmərəm. Çinki hələlik proqnozlarım yekunlaşmayıb. Lakin onu deyə bilərəm ki, bu il iqtisadi hadisələr, təbii fəlakətlərlə yox, əsaslı siyasi proseslərlə yadda qalacaq. Həlledici siyasi qərarların verilməsi, bir sıra siyasi proseslərin başa çatması bu ilə təsadüf edəcək. Azərbaycan tarixi üçün yaddaqalan hadisələrin bu zaman kəsiyində baş verməsinin şahidi olacağıq.