Son zamanlar əhali arasında kimyəvi təmizləmə məntəqələrindən şikayət artmaqdadır və bu da təsadüfi deyil. Əhali arasındakı bu narazılıqların haqlı əsasları var. Belə ki, istər xalçaların təmizlənməsi, istərsə də müxtəlif geyimlər, gündəlik istifadə etdiyimiz dəsmalların, yataq dəstlərinin və sair təmizlənməsində istifadə olunan kimyəvi təmizləyicilərin demək olar ki, mənşəyi bəlli deyil. Həqiqətənmi bu kimyəvi yuyucu vasitələri insan həyatı üçün təhlükəsizdirmi?
Çamaşırxanalarda keçirdiyimiz sorğular bunu əksini düşünməyə məcbur edir. Hansı çamaşırxanadan istifadə etdiyi kimyəvi maddələrin təhlükəsizliyini, mənşəyini təsdiq edən sertifikatlar tələb etsək də, müsbət cavab ala bilmədik. Görəsən, bu sahədə müvafiq bir nəzarət varmı? Məhz bu mənşəyi bəlli olmayan kimyəvi maddələrin təsirindən xalçaların rəngi solur, lakin ləkələr olduğu kimi qalır. Birbaşa dərimizlə təmasda olan paltarlarımızın bu mənşəyi bəlli olmayan kimyəvi maddələrlə yuyulması gələcəkdə biz insanlarda ən yaxşı halda ağır allergik reaksiyalar, ən pis halda dəri xərçənginin yaranmasına yol açmayacağına kim zəmanət verə bilər? Hələ bu çamaşırxana və kimyəvi təmizləmə məntəqələrindəki sanitar gigiyenik qaydalara nə dərəcədə əməl olunduğunu bilmirik. Kiçik bir xəta, natəmizlik, paltarların qarışdırılması sağalmaz dəri xəstəlikləri ilə nəticələnə bilər.
Nəticədə bir çox sual yaranır:
Hər ürəyi istəyən vətəndaş bu fəaliyyətlə məşğul ola bilərmi? Bu sahədə hansı tələblər mövcuddur, hansı standartlar tətbiq olunmalıdır, istifadə olunan kimyəvi maddələrin hansı miqdarda istifadə olunmalıdır.
Sumqayıtda da 5-ci mikrorayonda "Eco Clean” quru təmizləmə və camaşırxana şəbəkəsi, 15-ci məhəllədə "Mak Dray" kimyəvi təmizləmə məntəqəsi, "Pak – təmizlik dünyası” kimyəvi təmizləmə kompleksi kimi belə məntəqələr fəaliyyət göstərir. Maraqlıdır, görəsən onlar bütün sadaladığımız standartlara, tələblərə nə dərəcədə cavab verir?
Mövzunu gündəmdə saxlayaraq bu yaxınlarda sözügedən mövzu üzrə araşdırmalar aparacağıq.

Xeberle.com