Sumqayıt Reabilitasiya Mərkəzində "Sumqayıt narkomaniyaya yox deyir” devizi altında maarifləndirici xarakterli görüş keçirilib. Tədbir Sumqayıt şəhər Gənclər və İdman Baş İdarəsi, şəhər polis idarəsi və Narkoloji Dispanserin birgə təşkilatçılığı ilə reallaşıb.
Baş İdarədən Xeberle.com-a bildirilib ki, görüşün keçirilməsində məqsəd gəncləri sağlam həyat tərzi sürmələrinə təşviq etmək, narkomaniya və narkomanlıq, tütün, alkoqol və digər psixotrop maddələrin mənfi təsiri ilə bağlı məlumatlandırmaq və onların bu sahədə davranışlarının təkmilləşdirilməsidir.
Görüşdə çıxış edənlər Baş İdarənin rəisi Elgün Hümbətov, Sumqayıt Reabilitasiya Mərkəzinin direktoru Pərvanə Hacıyeva, şəhər polis idarəsinin əməkdaşı Azər Bağırov, Narkoloji Dispanserin həkimi Vüsal Cabbarov və Mərkəzin psixoloqu Əzizə Güləhmədova antinarkomaniya tədbirlərinin ölkəmizdə gənclərlə bağlı dövlət siyasətinin mühüm tərkib hissəsinə çevrildiyini bildiriblər. Bütövlükdə bəşəriyyət üçün təhlükəli bəla olan narkomaniyanın gənclər və yeniyetmələr arasında daha çox yayılma təhlükəsindən, QİÇS, Hepatit kimi sağalmaz xəstəliklərə düçar edən narkotik vasitələrin və onların prekursorlarının insan orqanizminə və psixologiyasına vurduğu zərərlərdən geniş bəhs edərək, gənclərə zərərli vərdişlərdən uzaq olmağı tövsiyə ediblər.
Sonda gəncləri maraqlandıran suallar cavablandırılıb, mövzu ilə bağlı videoçarxlar nümayiş olunub.
Xəbərdən istifadə edərkən istinad etmək vacibdir.
