Xatırlayırsınızsa, bu günlərdə Sumqayıt şəhərində yerləşən 2 saylı məktəbin 10-11-ci sinif şagirdlərinin valideyinləri Axar.az-a şikayət etmişdilər. Onların həmin portaldakı şikayəti bu cür idi:
"Ölkənin birinci xanımı Mehriban Əliyevanın təşəbbüsü ilə tikilən 2 saylı məktəbdə nə dərs keçən var, nə də ki, məktəbə gələn. Müəllimlərin və şagirdlərin davamiyyəti isə demək olar ki, çox zəifdir. Burada 1-ci sinifdən 11-ci sinfə qədər dərs oxuyan yoxdur, ümumi olaraq şagirdlər repetitorların yanına gedir. Şagirdlərin dərs cədvəlində 5-6 dərsin olmasına baxmayaraq, hər gün 3-4-cü dərsdən sonra evə buraxılırlar. Həftənin şənbə günü isə ümumiyyətlə 10-11-ci sinif şagirdləri dərsə gəlmirlər. Valideynlər də məktəbə buraxılmır. Soruşanda deyirlər ki, kamera var.   Adının çəkilməsini istəməyən bir 10-cu sinif şagirdinin dediyinə görə, müəllimlər onları dərsdən geri qaytarıb, repetitorların yanına getməyi məsləhət görüblər. Gözdən-könüldən uzaq ərazidə yerləşən bu məktəbdə qayda-qanuna riayət edənin olmadığı bildirilib. Adlarının çəkilməsini istəməyən 10-cu sinif şagirdləri məktəbin “bazar” olduğunu iddia edirlər”

Bütün bu deyilənləri dəqiqləşdirmək, qarşı tərəfin fikrini bilmək üçün məktəbin direktoru Müqabil Abbasova müraciət etdik. Direktoru bunları dedi:

“Tikildiyi vaxtdan -2007-ci ildən - Sumqayıt şəhər 2 saylı orta məktəbinin direktoruyam. Riyaziyyat müəllimiyəm. O ki qaldı, sizin dediyiniz məsələ ilə bağlı, mən bu deyilənləri anlaya bilmirəm.

1-ci sinifdən 5-ciyədək, 8-ci sinif daxil olmaqla, ibtidai siniflər sayıldığından şənbə və bazar günləri dərs olmur. Ümumilkdə isə şənbə günləri bütün məktəb üzrə iməcilik olur.
Məktəbdə necə dərs keçilmir ki, şagirdlərin sayı 370 ilə başlayıb artıq 670 şagirdə çatıb.
Ali məktəblərə qəbul sayımız liseylərdən sonra ilk yerdədir.
Bizdə dərs də keçilir, qayda-qanun da var. Hal-hazırda ölkənin ən ucqar yerlərində belə dərs keçilir, qayda-qanun hökmə sürür. Şəhərdə bu, necə ola bilər ki?! Şikayəti kim edibsə, onun qərəzli olduğu görünür.

Könül Salahova, Xeberle.com